Хабаргузории “Азия-Плюс” аз таҳдиди муовини мудири литсейи рақами 5-и Душанбе ба кормандонаш шикоят кардааст.
Бино ба иттилои расонаҳо, 11-уми окятбри соли 2024 Файзалӣ Содиқов, муовини мудири литсейи рақами 5-и шаҳри Душанбе баъди нашри як мақолаи интиқодӣ ба дафтари “Азия-Плюс” рафта, кормандони онро таҳдид кардааст.
Ба қавли манбаъ, Файзалӣ Сиддиқов дар раъси як гурӯҳи тақрибан 20-нафарӣ иборат аз волидайни хонандаҳо ба идораи дафтари “Азия-Плюс” рафта, бо лаҳни тунд талаб намудааст, ки мақола аз саҳфаҳои ин расона бардошта шавад, вале вақте ҷавоби рад гирифтааст, кормандонро таҳдид кардааст, ки “бегоҳӣ дар кӯчаҳо эҳтиёт шаванд.”
Ин баҳс аз шикояти як сокини шаҳри Душанбе сар зад, ки гуфта буд, мактаб маблағ барои дарсҳои нододаи фарзандашро талаб кардааст. “Азия-Плюс” ибрози нигаронӣ кардааст, ки амнияти кормандонаш дар хатар аст. То ҳол ҷониби литсей ва Раёсати корҳои дохилӣ дар ин бора изҳори назар накардаанд.
Дар шароити кунунии Тоҷикистон таҳдид ба журналистон, блогерҳо ва ҳама касоне, ки метавонанд аз тариқи воситаҳои ахбори омма ва шабакаҳои иҷтимоӣ аз озору азияти мардум тавассути мақомот ва дигар кормандони давлатӣ ва дарду ранҷи сокинон гап бизананд, хеле маъмулӣ шудааст.
Гуфта мешавад, бо вуҷуди он ки мақомоти расмӣ дар Тоҷикистон борҳо эълон кардаанд, ки ҳамагуна пулситониҳои ғайриқонунӣ аз ҷайби хонандаҳо хилофи қонунгузорӣ ва ҷурм дониста мешавад, вале масъулин бо сабаби кам будани маоши кормандони муассисаҳои идорӣ роҳҳои дигареро пеш гирифтаанд. Дар хеле аз мактабҳои кишвар бо баҳонаи таъмиру харидани пардаву таҷҳизоти гармидиҳӣ ва ба ном дарсҳои иловагӣ аз ҷайби мардум пул меситонанд, ки ин чизҳо мардумро асабонӣ ва нороҳат кардааст.
