Дабири кулли Созмони Амнияти Аҳдномаи Дастаҷамъӣ гуфтааст, ки барномаи ҳадафманди байни давлатӣ барои тақвияти марзҳои Тоҷикистон бо Афғонистон то охир сол қабул мешавад.
Бино ба итттилои расонаҳо, Дабири кулли Созмони Аҳдномаи Амнияти Дастаҷамъӣ (СААД) изҳор дошт, ки “корҳои доимӣ барои рушди тадбирҳои мушаххас бо мақсади таҳкими фазои амниятӣ дар ҳоли иҷро қарор доранд. Намунаи равшани ин барнома — барномаи ҳадафманди байнидавлатии СААД барои тақвияти сарҳадоти Тоҷикистону Афғонистон мебошад, ки қабули он дар соли ҷорӣ ба нақша гирифта шудааст.”
Ба гуфтаи ӯ, байни аъзои Созмони Аҳдномаи Амнияти Дастаҷамъӣ дар мавриди ҳамаи масъалаҳои мавҷуда баҳсҳои озодона ва содиқона сурат мегиранд ва қарорҳои он бо риояи комили принсипи иттифоқи оро қабул мешаванд.
Дабири кулли СААД таъкид карда, кишварҳои узви ин созмон “аз лиҳози масоили асосии дастгирии ҳамдигар ва амнияти дастаҷамъӣ якҷоя амал мекунем.”
Ба гуфтаи бархе коршиносон, раҳбарияти олии Тоҷикистон тайи беш аз даҳ сол роҳҳои муфт дарёфт кардани пулро хеле хуб ёд гирифтаанд ва яке аз намунаҳои боризи он ҳамин баҳонаи ҳифзи сарҳадот аст. Дунёро аз Толибон метарсонанд, вале худашон барои сокинони кишвар дар таъмини барқ маҳдудиятҳои зиёде ҷорӣ мекунанд ва барқи истеҳсолашударо ба Афғонистон мефурӯшанд. Бо Толибон муносибатҳои дипломатӣ барқарор мекунанд, то ҷое, ки дар Вилояти Мухтори Кӯҳистони Бадахшон барои онҳо иҷозати фаъолият низ додаанд.
Гуфтанист, ки қарор дар бораи тақвияти сарҳади Тоҷикистон ва Афғонистон дар соли 2013 қабул шуда буд.
