Субҳи имрӯз ахбору гузоришҳое дар шабакаҳои иҷтимоӣ паҳн шуда, ки мегӯянд Ёдгор Файзов, раиси Вилояти Мухтори Кӯҳистони Бадахшон аз мақомаш барканор ва раиси шаҳри Хорӯғ ба маснади ӯ такия задааст.
Тибқи гузоришҳои нашар шуда, муаллифон иддаъо доранд, ки иллати барканории раиси Вилояти Мухтори Кӯҳистони Бадахшон ҳанӯз маълум нест, аммо баъд аз зуҳри имрӯз генерал Алишер Мирзонаботов, собиқ раиси шаҳри Хорӯғ расман раиси нави вилоят муаррифӣ хоҳад шуд.
Хабари барканории Ёдгор Файзовро аз мақомаш ҳамчун раиси Вилояти Мухтори Кӯҳистони Бадахшон бархе расонаҳои маҳаллӣ низ дар Тоҷикистон бо истинод ба манбаъҳои худашон таъйид карданд, аммо ин хабар дар шабакаҳои иҷтимоӣ бо вокунишҳои мухталифи корбарон рӯбарӯ шуда, қисме аз он таҳсин ва қисме дигар ҳам афсус хурда, ки дар 30 соли ахир курсии раёсати вилоят беҳтар аз ӯ касе надида буд.
Бо ин вуҷуд, ҳанӯз маълум нест, ки оё ин тағйироти кадрӣ боиси боло рафтани мақоми Ёдгор Файзов дар ҳукумат гардида ё поён кашондани он аз мақомаш ва ё ин, ки иллати ин тағйирот канор задани вай аз майдони сиёсат дар Тоҷикистон аст.
Ёдгор Файзови 60-сола пеш аз раиси Вилояти Мухтори Кӯҳистони Бадахшон интихоб шуданаш ба муддати 25 сол дар сохтори Фонди Оғохон кор карда, аз соли 2004 то замони раиси вилоят таъйин шуданаш дар соли 2018 раҳбарии Фонди Оғохон дар Тоҷикистонро бар ӯҳда дошт.
Ёдгор Файзов бо собиқаи корие, ки дар Фонди Оғохон дошт, дар байни мардуми Бадахшон аз нуфӯзи бештаре бархӯрдор буд ва яке аз далоили ба ҳайъати Ҳукумати Тоҷикистон ҷалб шудан ва сипас ба болотарин мақом дар ВМКБ таъйин шуданаш ҳам ҳамин соҳибнуфӯз будани вай буд, аммо пас аз сафари ахири президент Эмомалӣ Раҳмон дар сентябри соли ҷорӣ ба ин вилоят ва аз ҳад зиёд чоплӯсӣ кардани ӯ боис шуд, ки ҷойгоҳи қаблии худро дар байни мардум аз даст диҳад.
