Мақомот мехоҳанд ду бинои таърихии шаҳри Душанбе чойхонаи “Роҳат” ва Театри Лоҳутиро тахриб кунанд.
Тахриби ин ду бинои таърихиро Низом Мирзозода, раиси Кумитаи сохтмон ва меъмории Тоҷикистон, рӯзи 29-уми июл дар нишасти матбуотӣ таъйид кард, аммо нагуфт ин биноҳо кай тахриб мешаванд.
Дар пайи аз нав сохтани бинои ҳукумати Тоҷикистон як қисмати чойхонаи “Роҳат” тахриб шуда буд, аммо қисмати асосии он ҳанӯз боқӣ мондааст.
Ба иддаои Мирзозода, дар ҷойи ин биноҳо, биноҳои замонавӣ сохта шуда, бренди чойхонаи “Роҳат” ва Театри ба номи Лоҳутӣ нигоҳ дошта мешавад.
Пештар аз ин низ дар нишасти матбуотии моҳи феврал Мирзозода аз эҳтимоли тахриби чойхонаи “Роҳат” гуфта буд, аммо ин мақомдор дар бораи тақдири Театри Лоҳутӣ чизе нагуфта буд.
Ҳафтаи гузашта низ муовини вазири фарҳанг Манучеҳр Шарифзода тахриби бинои Театри Лоҳутиро рад карда, таъкид карда буд, ки ин иттилоъ асоси воқеӣ надорад ва танҳо овоза аст.
Бояд гуфт, баҳси вайрон кардан ё мондани чойхонаи “Роҳат”, ки соли 1958 сохта шудааст, ҳадди ақал ҳафт сол боз идома дорад ва мақомот то ҳол таърихи мушаххаси тахриби онро эълон намекунанд.
Сокинони кишвар мегӯянд, чойхонаи “Роҳат” ҳамчун бинои таърихӣ бояд ҳифз шавад, аммо мақомот иддао мекунанд, ки ин бино ба феҳристи ёдгориҳои таърихиву фарҳангии кишвар шомил намешавад.
Тахриби осори боқимонда аз замони Тоҷикистони Шӯравӣ тайи даҳ соли ахир суръати бештаре касб карда, мақомот то ҳол чанд бинои қадимии Душанбе, ба мисли биноҳои шаҳрдорӣ, Вазорати кишоварзӣ, Театри ба номи “Маяковский” ва Кохи раёсати ҷумҳурии Тоҷикистонро вайрон кардаанд.
Инчунин чанде пеш дар шаҳри Душанбе ёдгории меъмории маъруф ба номи “Танка”-ро ба “Боғи Ғалаба” кӯчониданд.
Ба гуфтаи таҳлилгарон, ҳукумат талош дорад, ки тамоми осор ва нишонаҳои таърихиро дар шаҳри Душанбе аз байн барад ва ба ин тариқ ба наслҳои баъдӣ нишон диҳад, ки бунёдгузори Душанбеи навин Эмомалӣ Раҳмон аст.
