Расонаҳо ба нақл аз мақомоти Тайланд мегӯянд, ки дар ҳамлаи як собиқ афсари полис 34 нафар кушта ва 12 каси дигар захмӣ шудааст.
Бино ба иттилои Мақомоти полиси Тайланд ҳам ба расонаҳо гуфтаанд, ки чунин ҳодисаи тирандозӣ ба сӯи мардум дар ин кишвар як амри нодир мебошад ва ҳамлакунанда нафарест, ки чанде пеш аз кор дар сафи полис барканор шуда буд. Хабаргузории Фаронса теъдоди кӯдакони қурбонӣ шударо дар ин ҳодиса 23 ва “Independent” 22 нафар гуфтааст. Полиси Тайланд гуфтааст, ки ангезаи асосии ин ҳамла ҳанӯз маълум нест. Ҳамзамон “Independent” ба нақл аз бархе расонаҳои Тайланд хабар додааст, ки ин ҳодиса дар яке аз устонҳои Шимолу Шарқи Тайланд ва он ҳам замоне, ки кӯдакон хоб будаанд, сурат гирифтааст. Ин собиқ афсари полис “аз муътодони маводи мухаддир” буда ва пас аз ин ҷиноят ҳамсар ва духтари худашро низ кушта ва баъд аз он худкӯшӣ кардааст.
