Расонаҳои Афғонистон аз таркиш дар масҷиди Пули Хиштии Кобул хабар дода мегӯянд, ки то кунун захмӣ шудани шаш нафар дар ин ҳодиса тасдиқ шудааст.
Шоҳидони айнӣ ба расонаҳо гуфтаанд, ки таркиш дар дохили бузургтарин масҷиди Кобул замоне рух дод, ки мардум намози пешинро адо мекарданд.
Абдунофеъ Таквар, сухангӯи Вазорати корҳои дохилии Толибон дар Афғонистон бо таъйиди ин хабар ба Омоҷнюс гуфтааст, ки ин таркиш бархоста аз як “бомби дастӣ” буда, шаш нафар захмӣ шудааст. Бо иттиҳоми даст доштан дар ин ҷиноят як нафар боздош гардидааст.
Аммо шоҳидони ҳодиса гуфтаанд, ки теъдоди осебдидагон бештар аз он чизе аст, ки мақомоти расмӣ эълон мекунанд. Инчунин дар як навори видеоӣ, ки ба расонаҳо роҳ ётфтааст, дида мешавад, намозгузорони зиёде пас аз ин таркиш бо тарсу ҳарос пароканда шуда, аз ҷои ҳодиса дур мешаванд.
Масҷиди Пули Хиштии Кобул дар маркази Кобули қадим, яке аз ҷойҳои пуродами пойтахти Афғонистон бино шудааст. Ин масҷид дар қарни 18 мелодӣ сохта шуда, дар даҳаи 1960 ба фармони Муҳаммад Зоҳиршоҳ, президанти вақти ин кишвар бозсозӣ ва тавсеа ёфт. Инчунин дар ҷангҳои солҳои 1990-и Кобул ҳам ин масҷид осеб дида, аммо дубора бозсозӣ шуд.
