Бар асари як таркиш дар маркази шаҳри Душанбе дасти кам ду нафар ҷароҳат бардоштааст.
Бино ба иттилои расмӣ, зуҳри имрӯз, 30-уми октябри соли 2023 дар шаҳри Душанбе, пойтахти Тоҷикистон, “тақрибан соати 13:24-дақиқа, дар ошхонаи “Мерве”, воқеъ дар хиёбони Рӯдакӣ аз ҳисоби гази моеъ таркиш ба амал омад.”
Ба қавли сомонаи Вазорати корҳои дохилии Тоҷикистон, “дар натиҷаи ин таркиш ду нафар шаҳрвандон, як нафар корманд ва як нафар мизоҷи ошхонаи мазкур ҷароҳат бардоштаанд. Ҳамзамон як адад воситаи нақлиёти тамғаи “Лексус”, ки дар наздикии ошхона қарор дошт, зарари техникӣ дидааст.”
Гуфта мешавад, мақомоти расмӣ дар бораи дигар ҷузъиёти ин ҳодиса шарҳе надодаанд, вале Вазорати корҳои дохилӣ мегӯяд, “аз ҷониби мақомоти ҳифзи ҳуқуқ ҳамчун ҳодисаи нохуш ба қайд гирифта шуда, мавриди санҷиш қарор дорад.”
Ошхонаи Мерве яке аз ошхонаҳои шинохта дар пойтахти Тоҷикистон аст, ки тайи тақрибан ду даҳсола фаъолият мекунад. Ин ошхона таомҳои тезтаёри туркиро ба мизоҷони худ пешниҳод мекунад. Солҳои 2009 ва 2018 низ дар ин ошхона сӯхторҳое ба қайд гирифта шуда буд.
