Шоми 10-уми май дар як нуқтаи фурӯши сӯзишворӣ дар ҷамоати деҳоти Оббурдони ноҳияи Мастчоҳ таркиши бузург рух дод, ки дар натиҷа 6 нафар захмӣ шуда, дар бемористони ноҳия бистарӣ шуданд.
Як манбаъ аз ҷамоати мазкур бо шарти ифшо нашудани номаш ба Azda tv гуфт, нуқтаи сӯзишворӣ дар наздикии бозори марказии ҷамоати Оббурдон ҷойгир буда, пас аз таркиш пурра хароб шудааст.
Гуфта мешавад, ҳодиса ҳангоми холӣ кардани сӯзишворӣ аз комиюни бензин (бензовоз) ба зарфҳои нигаҳдории маводи сӯхт сар задааст.
Дар шарҳи ҳодиса манбаъ гуфт: “Бегоҳ буд, як комиюни бензин ба зарфҳои нигаҳдории маводи сӯхт сӯзишвории бензин холӣ мекард, ногоҳ оташ гирифт ва оташи он ба комиюни газ, ки каме дуртар меистод расид ва бо ҳамин як таркиши хеле сахт ба вуқуъ пайваст, ки тирезаҳои хонаҳои гирду атроф рехтанд.”, мегӯяд манбаъ.
Ба қавли манбаъ, дар наздикии ин нуқтаи фурӯши сӯзишворӣ мактаби миёнаи рақами 26-и ҷамоат ва корхонаи пахтатозакунии “Вализода” ҷойгир буданд, ки тирезаҳои онҳо низ ба пуррагӣ рехтанд.
Хушбахтона аз ин таркиши сахт талафоти ҷонӣ ба қайд гирифта нашудааст, аммо ба қавли манобеъ 5-6 нафар ҷароҳати вазнини ҷисмонӣ бардошта, ба бемористон мунтақил шуданд.
Гуфта мешавад, нуқтаи сӯзишвории мазкур ба соҳибкори ҳамин ҷамоат Наврӯзов Ҷамшед тааллуқ дорад.
То ҳол мақомоти кишвар расман дар бораи хисороти ворида аз ин ҳодисаро эълон накардаанд.
