Паймони миллии Тоҷикистон – эътилофи гурӯҳе аз мухолифини тоҷик, ки дар хориҷ аз кишвар қарор доранд, дар Аврупо Ситоди кумак ба муҳоҷирони тоҷик, ки дар пайи ҷанг аз Укроин ба Аврупо паноҳ мебаранд, ташкил кардааст.
Шоҳнаими Карим, муовини раиси Ҳизби наҳзати исломии Тоҷикистон, ки ҳоло раҳбарии Ситоди кумак ба муҳоҷиронро бар душ дорад, дар суҳбат бо АЗДО ТВ гуфт, ин ситод шабонарӯзӣ фаъолият дорад ва дар ин муддат шаҳрвандони Тоҷикистонро, ки аз Укроин ба Аврупо паноҳ мебаранд, роҳнамоӣ намуда, ба онҳо кумаки ҳуқуқӣ мерасонанд.
Дар идома Шоҳнаими Карим афзуд, ки ПМТ ба ҳама давлатҳои Аврупоӣ, ки ҳаммарз бо Укроин ҳастанд, барои кумак ва қабули муҳоҷирон нома навиштааст.
Раиси Ситоди кумак ба муҳоҷирин гуфт, ки баъд аз ҷамъоварии гузоришҳо омодааст ба расонаҳо маълумоти муфассале аз кори ин ситод ироа намояд.
Ҳамзамон Исломҷон Саидов, намоядаи ПМТ дар Лаҳистон дар суҳбат бо АЗДО ТВ гуфт, ки ситод дар муддати ду рӯз беш аз 100 муҳоҷири тоҷик, узбек ва қирғизро, ки аз Украина ба хоки Аврупо паноҳ бурдаанд, кумак ва роҳнамоӣ намудааст. Ӯ афзуд, “ҳоло низ муҳоҷирони зиёде дар роҳ ҳастанд ва бо онҳо дар тамос ҳестем ва барои кумаки онҳо омодагӣ мебинем.”
Саидов мегӯяд, дар байни ин муҳоҷирон калонсолон ва кӯдакон зиёданд ва онҳое, ки шароит ва ҷойи зист надоранд, онҳоро бо мошинҳо ба хонаҳои дигар ҳамватанон бурда, бо ҷойи хоб таъмин карданд.
Ба гуфтаи намояндаи ПМТ дар Лаҳистон, Ситоди кумак ба муҳоҷирон шабонарӯзӣ фаъол аст ва ба ҳар муҳоҷири ниёзманд, ки дар Лаҳистон бе ҷои зист мондааст ва ё ниёз ба кумакҳои ҳуқуқӣ дорад, кумак карда истодаанд.
Ёдовар мешавем, ки бомдоди 24-уми феврал артиши Русия бо фармони Путин ба қаламрави Украина ҳамла кард, ки дар натиҷаи ҳамлаҳои пайдарпай садҳо нафар куштаву захмӣ шуданд ва даҳоҳазор нафар тарки ин кишвар карда истодаанд. Ҳукумати Лаҳистон эълон кард, ки аз аввали ҷанг то имрӯз беш аз 200 ҳазор нафар ба хоки ин кишвар паноҳ бурдаанд ва ҳазорҳо нафари дигар дар назди марзҳои Лаҳистон барои ворид шудан ба ин кишвар мунтазиранд.
