Тоҷикистон дар манотиқи душворгузари кӯҳистонии марз бо Афғонистон 33 дидбонгоҳи нави сарҳадӣ таъсис додааст.
Ба иттилои дафтари матбуоти Дастгоҳи Президент, 14-уми октябр Эмомалӣ Раҳмон дар мулоқот бо роҳбарон ва фаъолони Вилояти Мухтори Кӯҳистони Бадахшон гуфт, ки назорат дар марз бо Афғонистон бояд пурзӯртар карда шавад.
Ба қавли манбаъ, Президенти Тоҷикистон дар бораи минтақаҳои душворгузари кӯҳӣ ва дигар мавзеъҳои ба мушкилӣ назоратшаванда гуфт, “вақтҳои охир иловатан 33 дидбонгоҳи сарҳадӣ таъсис дода шуд, ки боиси беҳтар шудани назорат гардид.”
Инчунин вай таъкид кардааст, ки то имрӯз зиёда аз 30 километр хатти сарҳади давлатӣ бо симтӯру симхор ва камераҳои назоратӣ муҷаҳҳаз гардида, то охири соли равон ин кор то беш аз 50 километр хоҳад расид.
Ба назари бархе таҳлилгарон, ду чизе, ки Эмомалӣ Раҳмонро бисёртар нигарон кардааст, яке гардиши ғайриқонунии маводи мухаддир дар сатҳи кормандони давлатӣ ва дигаре бо вуҷуди саркӯбҳои шадид ва қатли оммҳо дар солҳои гузашта, ҳанӯз сатҳи бедорӣ дар байни мардуми вилоят нисбат ба бархе минтақаҳои дигар зиёдтар ба назар мерасад, ки ӯро хеле нигарон кардааст ва дар ин мавридҳо бо нороҳатии бештар суҳбат мекунад.
Гуфта мешавад, сафари кории Эмомалӣ Раҳмон ба Вилояти Мухтори Кӯҳистони Бадахшон 12-уми октябри соли ҷорӣ оғоз гардида, имрӯз ба поён расид. Вай дар рафти ин сафари худ то ҳадде, ки тавонист дастовардҳои ҳукумати 33-солаашро таърифу тавсиф карду аз сӯи дигар болои мардум ва сокинони ин вилоят миннат карда, аз ҷумла гуфт, ки дар ин муддат истеҳсоли шир дар сатҳи ин вилоят 2 баробар зиёд шудааст.
