Дар вилояти Бодканд нишасти ҳайатҳои ҳукуматии Тоҷикистону Қирғизистон бо роҳбарии раисони Кумитаи давлатии амнияти миллӣ Саймумин Ятимов ва Қамчибек Тошиев дар масъалаи таъйину аломатгузории марзи давлатии ҳарду кишвар баргузор гардид.
Бино ба иттилои расонаҳо музокирот шоми 1-уми май оғоз ёфта, соати 3-и субҳи 2-юмт май ба поён расид.
Дар ин нишаст раисони Кумитаҳо ба эътидол овардани вазъ дар минтақаҳои наздимарзиро баррасӣ карданд.
Ҳамчунин тавофуқоте барои шиддат бахшидани тавзеҳи бештар дар маврриди таъини хатти лоиҳавии марзи давлатии Тоҷикистону Қирғизистон дар қитъаҳои боқимондаи сарҳади давлатӣ ҳосил шуд
Дар натиҷаи ҷаласаи ҳайатҳои ҳукуматӣ Протоколи муштарак ба имзо расид. Аммо, ҷузъиёти протокол то ҳол ошкор нашудааст.
Бино бар иттилои Ҳалимҷон Ҷӯраев хабарнигори “Азия-Плюс”, ки дар нуқтаҳои даргирӣ қарор дорад, Саймуммин Ятимов раиси КДАМ Тоҷикистон, Раҷаббой Аҳмадзода раиси вилояти Суғд ва Азим Иброҳим, вазири нақлиёти Тоҷикистон ба Ворух омада бо мардум мулоқот мекунанд.
Саймумин Ятимов баъд аз анҷоми мулоқот дар суҳбати ҳузурӣ ва бидуни сабт ба хабарнигорон гуфт:
“Ҳадафи асосии мо даъвати мардум ба ҳамзистии осоишта аст. Ҳар чӣ буд, гузашт. Феълан бояд талош кунем, ки мардум дар осоиш ва ҳамдигарфаҳмӣ зиндагӣ кунанд. Феълан мо тамоми нерӯҳои низомиро аз марзҳо бозхонд кардем. Низоъи мусаллаҳ дар марз хотима ёфт. Акнун кӯшиш мекунем, ки бандҳои созишнома зина ба зина иҷро шавад ва масъалаи марзи Тоҷикистону Қирғизистон хотима ёбад”.
Ёдовар мешавем, ки рӯзи 28 апрел дар Ҷамоати деҳоти Хоҷаи Аъло шаҳри Исфара байни сокинони ду тараф сари маркази обтақсимкунии “Галавной” муноқиша сар зад. Дар ибтидо мардум байни ҳам сангпартоӣ карданд, вале рӯзи 29 апрел муноқиша ба тирпарронӣ ва даргирии шадид табдил шуд.
Тоҷикистону Қирғизистон 976 километр марзи муштарак доранд ва то кунун бештар аз 504 километри он мушаххас ва аломатгузорӣ шудааст.
Боқимондаи заминҳо дар марз номуайян боқӣ мондааст. Ин номуайянӣ боис шудааст, ки миёни сокинони наздимарзӣ танишҳо рух диҳанд, ки ба занозанию тирпаронӣ ва марги одамон аз ҳарду ҷониб мерасонад.
