Темур Раҳимов варзишгари шинохтаи тоҷик, дар мусобиқаи ҷудои “Antalya Grand Slam 2022” дар вазни +100 кг сазовори медали биринҷӣ гашт.
Темур Раҳимов, ки мусобиқаро аз даври дуюм шуруъ карда буд, дар ин давр бар Григорий Приор аз ИМА ва Магамедумар Магамедумаров аз АМА пирӯз шуд, вале дар чорякфинал аз намояндаи Венгрия Ричард Сипоз шикаст хӯрд.
Варзишгари тоҷик дар қувваозмоиҳои баъдӣ, Ушангӣ Кокаури аз Озорбойҷон ва Ҷозеф Терҳеки фаронсавиро шикаст дода, сазовори ҷои сеюм гашт.
Варзишгари дигари тоҷик Комроншоҳ Устопириён дар вазни -90кг бар намояндагони Озарбойҷон (Руфат Исмоилов) ва Чехия (Давид Кламмерт) пирӯз шуда, дар чорякфинал аз Лука Маисурадзеи гурҷистонӣ мағлуб гардид. Комроншоҳ имкон дошт мисли Темур сазовори ҷои сеюм гардад, аммо дар қувваозмоии баъдӣ аз Луис Крибер Гагнон аз Канада шикаст хӯрд.
Дигар варзишгарони тоҷик, аз ҷумла Меҳрзод Сӯфиев (-60кг), Абубакр Шеров (-66кг), Шаҳбоз Саидаброров (-66кг), Сомон Маҳмадбеков (-73кг), Ҷаҳонгир Маҷидов (-90кг) ва Абубакри Акобир (-100кг) дар даврҳои аввал аз ҳарифонашон шикаст хӯрданд.
Мусобиқаи ҷудои “Antalya Grand Slam 2022” аз 1-ум то 3-юми апрел дар шаҳри Анталияи Туркия бо иштироки 525 варзишгар (312 мард, 213 зан) аз 63 давлати дунё баргузор шуд.
Дар баробари медал ба варзишгарон барои ҷои аввал 5000 евро, барои ҷои дуюм 3000 евро ва барои ҷои сеюм 1500 евро ҷоизапулӣ таъин гардида буд.
Ёдовар мешавем, ки ин панҷумин медали Темур Раҳимов дар мусобиқаҳои ҷаҳонии ҷудо мебошад. Ин варзишгари тоҷик дар раддабандии ҷаҳонии ҷудо бо касби 3564 хол дар ҷойи севвум қарор дорад.
