Субҳи рӯзи сешанбе дар натиҷаи тирандозӣ дар дохили як мактаб дар шаҳри Қазони Русия 13 нафар аз донишомӯзон ва муаллимони он кушта шуданд.
Бино ба гузориши “Аздо тв”, ба нақл аз хабаргузории “Комерсант” мақомоти пулис ба расонаҳои маҳаллӣ гуфтанд, ки ҳадди ақал 13 нафар кушта ва 27 нафар маҷруҳ шудаанд. Дар байни кушташудаҳо кӯдакон низ ҳастанд. Ҳамчунин як муаллим низ дар ин тирандозӣ кушта шудааст.
Пулис гуфтааст, ҳамлагарон ду нафар будаанд, ки яке боздошт ва дуюмӣ кушта шуда аст. Гуфта шуда, ки фарди боздоштшуда ҷавони 19-сола будааст.
Аммо тибқи гузориши “MBK NEWS“, Вазорати корҳои дохилаи Тотористон ин хабарро рад карда гуфтааст, фарди ҳамлагар ҳамдасти дигаре надоштааст. Бо вуҷуди ин, пулис фарзия вуҷуд доштани ҳамлагари дигареро низ таҳқиқ дорад, менависад ин расона.
Шаҳри Қазон бо аксарияти мусулмон дар Ҷумҳурии Тотористони Русия воқеъ аст ва ин ҳамла ба мактаби рақами 175-и ин шаҳр сурат гирифтааст. Сабабҳои ин ҳамла то ҳол мушахас нашудааст.
Бар асоси тозатарин гузоришҳо, нерӯҳои мусаллаҳи пулис ва худравҳои имдодӣ дар маҳалли ҳодиса мустақар шудаанд.
Як навори видеоӣ, ки дар шабакаҳои иҷтимоӣ ҳамрасонӣ шуда, нишон медиҳад, ки бархе аз кӯдакони ин мактаб аз панҷара берун мепаранд.
Дар як навори дигаре низ дида мешавад, ки як навҷавон дар беруни сохтмони мактаб зоҳиран боздошт шудааст.
