Президенти Тоҷикистон бо судури як фармон “ба таври нақдӣ қабул намудани пардохти хизматрасониҳои музднок”-ро манъ карда аст.
Бино ба иттилои расмӣ, 22-юми июни соли 2023, Президенти Тоҷикистон бо судури як фармон гуфт, “аз 1 августи соли 2023:
– пардохти андозҳо, боҷҳои давлатӣ барои додани иҷозат ва иҷозатномаҳо, пардохтҳои дигари ҳатмӣ ба буҷет, ҷаримаҳо, маблағи суғуртаи ҳатмии давлатӣ, хизматрасониҳои тиббӣ, хизматрасониҳои коммуналӣ, намудҳои дигари хизматрасониҳои давлатӣ, инчунин қабули маблағҳо аз ҷониби вазорату идораҳо ва ташкилотҳои давлатӣ (минбаъд – хизматрасониҳои музднок) тариқи ғайринақдӣ амалӣ карда шавад.”
Инчунин тибқи ҳамин фармон таъкид шудааст, ки аз ҷониби вазорату идораҳо, ташкилотҳои давлатӣ ва ташкилотҳои қарзии молиявии ҷумҳурӣ ба таври нақдӣ қабул намудани пардохти хизматрасониҳои музднок манъ карда шавад.”
Эмомалӣ Рамҳон Бонки миллии Тоҷикистон, вазорату идораҳо, ташкилотҳои давлатӣ ва ташкилотҳои қарзии молиявии ҷумҳуриро вазифадор кардааст, ки иҷрооти заруриро барои қабули пардохтҳои ғайринақдии худ то 1 августи соли 2023 таҳия кунанд.
Гуфта мешавад, Президенти Тоҷикистон дар ҳоле ин фармони худро содир ва барои иҷрои ҳатмии он ду моҳ вақт таъйин кардааст, ки худи Ҳукумати Тоҷикистон дар робита ба ин омода нест ва Эмомалӣ Раҳмон бо додани 3 моҳ муҳлат ба ҳукуматаш дастур додааст, “санадҳои худро то 1 сентябри соли 2023 ба фармони мазкур мутобиқ намояд.”
Инчунин таъкид шудааст, ки Дастгоҳи иҷроияи Президенти Ҷумҳурии Тоҷикистон, вазоратҳои адлия, молия, Бонки миллии Тоҷикистон ва Хадамоти алоқаи назди Ҳукумати Ҷумҳурии Тоҷикистон то 31 декабри соли 2023 ҷиҳати фаъол намудани портали ягонаи пардохти хизматрасониҳои давлатӣ чораҷӯйӣ намоянд.
