Ҷумҳурии Тоҷикистон бо қотеъият ҳамлаи нерӯҳои ҳавоии Иёлоти Муттаҳидаи Амрико ва Исроил ба иншооти ҳастаии Ҷумҳурии Исломии Эронро маҳкум кард.
Вазорати корҳои хориҷии Тоҷикистон дар изҳороти расмиаш, ки рӯзи 23-уми июн нашр шудааст, аз шиддат гирифтани муноқиша, ки метавонад боиси табдил ёфтани низои кунунӣ ба ҷанги давомдор бо пайомадҳои хатарнок барои кулли минтақа ва ҷаҳон гардад, изҳори нигаронии ҷиддӣ кардааст.
Тоҷикистон аз Созмони Милали Муттаҳид, Ожонсии байналмилалӣ энержии атомӣ (IAEA) ва дигар созмонҳои бонуфузи байналмилалӣ даъват кардааст, ки барои роҳ надодан ба нақзи қонунҳои байналмилалӣ, пешгирӣ аз эҳтимоли фоҷеаҳои экологӣ ва таъмини пойдории сулҳу субот ва амният дар минтақа, қарорҳои фаврӣ ва қатъӣ қабул кунанд.
Инчунин Тоҷикистон аз талошҳои ҷомеаи байналмилалӣ, ки ба коҳиши ташаннуҷ ва барқарорсозии сулҳи пойдор дар Ховари Миёна равона шудааст, пуштибонӣ намуда, таъкид кардааст, ки роҳи ягонаи ҳалли ҳама гуна муноқиша ва низоъ танҳо тавассути муколамаҳои сиёсию дипломатӣ имконпазир аст.
Ба ҷуз Тоҷикистон инчунин чандин кишварҳо, аз ҷумла Чин, Қатар, Русия, Туркия, Арабистони Саудӣ, Алҷазоир, Африқои Ҷанубӣ, Покистон, Уммон, Кувайт ва дигарон ҳамлаҳои ИМА ва Исроил ба Эронро маҳкум ва аз густариш ёфтани ҷанг дар минтақа изҳори нигаронӣ кардаанд.
Дабири кулли СММ Антониу Гутерриш низ аз афзоиши хатарноки муноқиша дар Ховари Миёна изҳори “нигаронии амиқ” намуда, аз тамоми тарафҳо даъват кардааст, ки фавран амалҳои ҷангиро қатъ намуда, ҳуқуқи байналмилалиро эҳтиром кунанд, инчунин соҳибихтиёрии якдигарро эҳтиром ва аз ҳар гуна иқдоме, ки метавонад вазъиятро бадтар намояд, худдорӣ кунанд.
Дар ҳамин ҳол, Шӯрои амнияти СММ бо ташаббуси кишварҳое чун Русия ва Чин ҷаласаи фаврӣ баргузор намуда, зарбаҳои ҳавоӣ ба иншооти ҳастаии Эронро баррасӣ кардаанд ва чанд кишвари узв талаб доранд, ки қатънома дар бораи маҳкум кардани амалҳои ИМА ва Исроил қабул гардад.
