Вазири нақлиёти Тоҷикистон аз ҳамтои русаш хостааст, ки ҳамкориҳо дар соҳаи нақлиётро тавсеа диҳанд.
Вазири нақлиёти Ҷумҳурии Тоҷикистон Азим Иброҳим дар мулоқот бо вазири нақлиёти Федератсияи Русия Роман Старовойт аз вай хост, ки хатсайри қатора байни Душанбе-Маскав дубора фаъол шавад.
Азим Иброҳим пешниҳод кард, ки иҷозати ҳаракати воситаҳои нақлиёти боркаши Тоҷикистон тавассути дигар нуқтаҳои убури сарҳади Русия ва Беларус бозбинӣ шуда, шумораи рухсатномаҳои шакли P-3 барои нақлиёти боркаш зиёд карда шавад.
Инчунин вазири нақлиёти Тоҷикистон аз ҳамтои русаш хостааст, ки қатораи мусофирбари хатсайри “Душанбе – Маскав” ва кушодани хатсайрҳои нави байналмилалии автобус миёни шаҳрҳои бузурги Тоҷикистон ва Русия бори дигар барқарор карда шаванд.
Ба қавли сомонаи Вазорати нақлиёти Тоҷикистон ин мулоқот дар ҳошияи Форуми байналмилалии XVIII “Нақлиёти Русия – 2024” 21-уми ноябр дар шаҳри Маскав анҷом шуд. Форуми мазкур 21-ум оғоз шуда, то 26-уми ноябр дар Русия идома меёбад.
Гуфта мешавад, хатсайри қатора байни Душанбе, Маскав ва дигар хатсайрҳои автобус байни бузургшаҳрҳои Тоҷикистону Русия то ибтидои соли 2020 амал мекарданд, вале дар замони ҳамагирии Коронавирус яктарафа аз ҷониби Русия қатъ карда шуданд ва то ҳол ин раванд дар хеле аз хатсайрҳо идома дорад.
