Ҳайати олимпии Тоҷикистон, ки иборат аз 10 варзишгар мебошад, имрӯз 19-уми июл ба Токио, бо масири “Душанбе-Истанбул-Токио” парвоз карданд.
Дар ин бора Кумитаи кор бо ҷавонон ва варзиши Тоҷикистон дар саҳфаи фейсбукии худ хабар дод. Дар расмҳои нашрнамудаи Кумита дида мешавад, ки Дилшод Назаров, муовини раиси Кумитаи кор бо ҷавононон ва варзиш низ ҳангоми гусели варзишгарони тоҷик иштирок доштааст.
Дар Бозиҳои олимпии “Токио-2020” Тоҷикистонро 10 варзишгар намояндагӣ мекунанд: Сомон Маҳмадбеков, Акмал Муродов, Комроншоҳи Устопириён, Темур Раҳимов ҷудокорон), Баҳодур Усмонов, Шаббос Неъматуллоев, Сиёвуш Зуҳуров (бокс), Илдар Аҳмадиев (навъи варзиши сабук) Анастасия Тюрина ва Олимҷон Эшонов (шиноварӣ).
Қаблан варзишгар Гулсумбӣ Шарифова ҳаққи ширкат дар Олимпиадаи Токиоро ба даст оварда буд, аммо ба иллати ҷароҳат бардоштан ӯ натавонист ба Токио бо дигар варзишгарон парвоз кунад.
Маросими ифтитоҳи Бозиҳои олимпӣ 23-юми июл баргузор мегардад. Парчами давлатии Тоҷикистонро ҷудокор Темур Раҳимов мебардорад.
Ҳунарнамоии варзишгарони Тоҷикистон дар “Токио-2020” 24-уми июл оғоз мешавад. Дар ин рӯз боксчиён Шаббос Неъматуллоев ва Сиёвуш Зуҳуров ба ринг мебароянд ва Баҳодур Усмонов рӯзи 27-уми июл баромад мекунад.
26-уми июл ҷудокор Сомон Маҳмадбеков ба рӯи гилеми куштӣ мебарояд. 27-уми июл Акмал Муродов ва рӯзи дигар Комроншоҳи Устопириён ба мубориза мепайванданд. Темур Раҳимов 30-юми июл ҳунарнамоӣ мекунад.
Шиноварон Олимҷон Эшонов ва Анастасия Тюрина рӯзи 30-юм ва варзишгар Илдар Аҳмадиев рӯзи 31 июл аз давидан ба масофаи 100 метр баромад мекунанд.
Барои 7 варзишгари тоҷик “Токио-2020” аввалин Бозиҳои олимпӣ дар карераашон аст. Комроншоҳи Устопириён, Анастасия Тюрина ва Олимҷон Эшонов иштирокчиёни Олимпиадаи “Рио-де-Жанейро-2016” мебошанд.
32-юм Бозиҳои олимпӣ бояд аз 24-уми июл то 9-уми августи соли 2020 баргузор мегардид, вале бо сабаби авҷ гирифтани бесории сироятии COVID-19 дар нимаи аввали соли гузашта, бозиҳо як сол ба таъхир афтод.
Ба барномаи Бозиҳои олимпии “Токио-2020” 33 намуди варзиш ворид гардидааст ва беш аз 11 000 варзишгари 205 давлати ҷаҳон барои ба даст овардани 339 маҷмӯи медалҳо мубориза мекунанд.
