Мақомоти зиндонҳои Тоҷикистон рӯзноманигор ва маҳбуси сиёсӣ Улфатхоним Мамадшоеваро ба маҳбаси занонаи Норак интиқол додаанд.
Улфатхоним Мамадшоева аз замони боздошташ то 6-уми майи соли ҷорӣ дар Боздоштгоҳи муваққатии шаҳри Душанбе нигоҳдорӣ мешуд.
Сабаби ба зиндони Норак бурдани ин маҳбуси сиёсиро “эътибори қонунӣ пайдо кардани ҳукм” гуфтаанд.
Радиои Озодӣ дар истинод ба манобеаш менависад, ки “ӯро рӯзи шанбе, 6-уми май, ба маҳбаси Норак интиқол доданд. То он вақт пайвандон чанд дафъа бо ӯ мулоқот карданд, аз саломатӣ шикоят надошт. Барои бозбинии ҳукм низ ариза нанавишта буд”.
Рӯзноманигор ва фаъоли маданӣ Улфатхоним Мамадшоеваи 66-сола баъд аз тазоҳурот ва нооромиҳои моҳи майи соли гузашта дар Бадахшон, ки бо марги даҳҳо нафар анҷомид, ҳамроҳи садҳо нафар аз фаъолони маданӣ аз ҷониби мақомоти кишвар боздошт шуд.
Дар аввалҳои моҳи декабри соли 2022, Улфатхоним Мамадшоева дар мурофиае пушти дарҳои баста бар асоси 8 банди қонун, аз ҷумла “даъвати оммавӣ ба сарнагунии сохти конститутсинонӣ”гунаҳкор дониста шуда, ба бист сол зиндон маҳкум шуд. Худи Улфатхоним Мамадшоева ва пайвандонаш иттиҳомоти мақомотро рад карда, онро сохта номида буданд.
Созмонҳои ҳомии ҳуқуқ борҳо аз ҳукумати Тоҷикистон раҳоии Улфатхоним Мамадшоева ва дигар фаъолонро талаб намуда, хоста буданд, ки боздоштҳои ғайриқонунии дигарандешонро бас кунад. Аммо ҳукумати Тоҷикистон талабу тавсияҳои созмонҳои ҳомии ҳуқуқро нодида мегирад.
