Иттиҳоди Аврупо эълом кард, ки интихоботи рӯзи 9 августи Белорус, ки барои бори шашум Александр Лукашенко баранда эълон шуд, “на озодона баргузор шуда ва на одилона будааст”.
Пас аз поёни интихобти рӯзи якшанбеи гузашта, Комиссияи интихоботи Беларус эълон кард, ки Александр Лукашенко бо 80,2 дарсади овозҳо дар ин интихобот пирӯз шудааст. Ин хабар эътирозҳои густардае дар саросари Беларусро ба бор овард. Нерӯҳои ҳукуматии Беларус барои саркӯби тазоҳуркунандагон ба хиёбонҳо баромаданд. Дар ин гирдиҳамоии омавии мардуми Белорус то кунун ба сабаби бархӯрди шадид нерӯҳои амниятӣ ҳадди аққал як нафар кушта ва 200 эътирозгар боздошт шудааст.
Хабаргузории “euronews” менависад, ки масъули бахши сиёсати хориҷии Иттиҳоди Аврупо, Ҷозеп Боррелл дар як изҳороте ба намояндагӣ аз давлатҳои аъзо гуфт, ки ин Иттиҳод “нисбати шахсоне, ки дар ин саркӯбии ошкори мардум, боздоштҳои худсарона ва тақаллуби натиҷаҳои интихоботӣ даст доранд, чора хоҳад андешид”.
“Дар ҷараёни маъракаи интихоботӣ мардуми Беларус борҳо омодагии худро барои ворид кардани тағироти демократӣ дар ин кишвар нишон додаанд … аммо дар ҷавоб масъулони ҳукумат аз хушунату саркӯбиҳои номуносиб ва ғайри қобили қабул истифода карданд”,- гуфт ҷаноби Боррел дар изҳороташ.
Як рӯз пеш аз эълони изҳороти Комиссияи Аврупо, вазири корҳои хориҷии Олмон, Ҳайко Маас низ ба “қонунӣ будани” пирӯзии Александр Лукашенко дар интихобот изҳори назар карда гуфт, ки Иттиҳоди Аврупо бояд дар қарори ахири худ оиди “бекор кардани таҳримҳо алайҳи Беларус”-ро аз нав дида барояд.
Ёдрас мекунем, ки аз ин пеш вазирони хориҷаи ИА бо ишора ба “рушди волоияти қонун дар Белорус”, ба сари лағви бахше аз таҳримҳои ҷорӣ намудаи ин Иттиҳод алайҳи кишвари Белорус мувофиқат карда буданд. Ин таҳримҳо якчанд ширкатҳои аслиҳаро, ки бо ҳукумати Беларус наздикӣ доштанд дар бар мегирифт. Илова бар ин, барои 170 нафар мамнуияти сафар ҷорӣ шуда, дороиҳояшон масдуд шуда буд.
Бино ба иттилои хабаргузории “euronews” вазирони хориҷаи Иттиҳоди Аврупо рӯзи 27 ва 28 августи соли ҷорӣ бори дигар дар Берлин нишаст доир намуда, лоиҳаи қатъномаи нави Лукашенкоро таҳия мекунанд. Интизор меравад, ки тарҳи мазкур дар ҷараёни нишасти раҳбарони Иттиҳоди Аврупо дар Брюссел 24 сентябр қабул карда шавад.
