Чин ба Тоҷикистон боз 125 миллион доллар кумаки бебозгашт медиҳад.
18-уми октябр Шӯрои Маҷлиси намояндагони Тоҷикистон дар ҷаласаи навбатиаш созишномаи Тоҷикистону Чин, ки дар моҳи июли соли ҷорӣ ба имзо расида буд, мавриди баррасӣ қарор додааст.
Дар хабар омада, ки созишнома бо сафарбаркунонии ҳайати коршиносони хитоӣ ҷиҳати омодасозии лоиҳаи Асосноккунии техникӣ-иқтисодӣ аз ҷониби Чин пешниҳоди кумаки бебозгаштро дар ҳаҷми 800 миллион юани хитоӣ пешбинӣ намудааст.
Ҳамчунин Чин ба Тоҷикистон барои ҷудо намудани кумаки молиявии бебозгашти иловагӣ барои сохтмони майдонҳои қисман калидии марҳилаи дуюми роҳи автомобилгарди Душанбе-Кулма, қитъаи Қалъаи Хумб-Ванҷ ва татбиқи лоиҳаҳои дигари басозишрасидаро пешниҳод намудааст.
Бино ба иттилои Вазорати нақлиёти Тоҷикистон, дарозии қитъаи Қалъаи Хумб – Ванҷ 80 километрро ташкил медиҳад.
Ҳангоми сохтмони иншоот сохтмони ду нақб бо дарозии 5,2 км, 67 трубаи обпошии диаметрҳои гуногун, 5 долони муҳофизатӣ бо дарозии 490 м, 15 пул бо дарозии 634 м, 180 девори муҳофизати сунъӣ бо дарозии 21,8 км, 54 км деворҳои муҳофизатӣ, 13 чуқури кушода бо дарозии 1,8 км дар назар гирифта шудааст.
Тибқи ҳисобҳои пешакӣ, барои амалисозии лоиҳаи таҷдиди ин қитъаи роҳ 228 миллион доллар лозим аст.
Чин дар солҳои охир сармоягузор ва кумакрасони асосии Тоҷикистон ба ҳисоб рафта, зиёда аз нисфи қарзи хориҷии Тоҷикистон ба Чин рост меояд.
