Дар рӯзи панҷуми Ҷоми ҷаҳон-2022 дар Қатар 4 бозӣ дар гурӯҳҳои “G” ва “H” баргузор шуд.
Бозии аввал миёни мунтахабҳои Швейтсария ва Камерун сурат гирифт. Ин бозӣ бо ҳисоби 1:0 ба фоидаи Швейтсария анҷом ёфт. Голи ягонаро дар ин бозӣ дар нимаи дуввум дар дақиқаи 48 ҳамлагар Брил Эмболо ба ҳадаф расонд.
Ин футбобози 25-сола голи задаашро ба дарвозаи Камерун ҷашн нагирифт. Чун худи Эмболо зодаи шаҳри Яунде пойтахти Камерун мебошад. Ӯ дар хурдӣ ҳамроҳи волидонаш аввал ба Фаронса, баъд ба Швейтсария ҳиҷрат кардааст.
Вохӯрии дуввум миёни мунтахбҳои Уругвай ва Кореяи Ҷанубӣ сурат гирфта, ҳарду тим ягон тӯб ба ҳадаф нарасонданд ва бозӣ мусовӣ 0:0 анҷом ёфт. Гуфта мешавад дар мунтахаби Уругвай футболбозони шинохтае мисли Луис Суарез, Диего Годин, Федерико Валверде, Кавани, Дарвин Нунез ва Роналд Араухо бозӣ мекунанд.
Бозии сеюм миёни мунтахабҳои Португалия ва Гана бо ҳисоби 3:2 ба фоидаи дастаи Протугалияи анҷом ёфт.
Дар нимаи дуввуми бозӣ дар дақиқаи 65 тӯбро аз пеналти капитани португалиҳо, ҳамлагар Криштиану Роналдо ба нишон расонда, ҳисобро боз кард. Дар дақиқаи 73-ум ҳамлагари Гана Андре Айю гол зада, ҳисобро баробар кард. Футболбозони португалӣ Жоау Феликс ва Рафаэл Леау дар дақиқаҳои 78 ва 80 ду тӯби дигар ва дар дақиқаи 89-уми бозӣ футболбози Гана Осман Бокар тӯбро ба ҳадаф расонданд.
Бозии чорум миёни тимҳои Бразилия ва Сербия сурат гирифта, ҳисоби бозиро дар дақиқаи 62-ум Ришарлисон ҳамлагарӣ бразилӣ боз кард. Пас аз чанд дақиқа ӯ тӯби дуввумро ҳам ба дарвозаи Сербия ба ҳадаф расонд. Мухлисон ва коршиносони соҳаи футбол голи дуввуми Ришарлисонро ба дарвозаи Сербия зеботарин голи даври якуми бозиҳои Ҷоми ҷаҳон-2022 номиданд.
Як рӯз пеш 4 бозӣ дигар дар гурӯҳҳои “E” ва “F” сурат гирифта, Испания Костарикоро бо ҳисоби 7:0 ва Белгия Канадаро бо ҳисоби 1:0 шикаст доданд.
Бозӣ миёни мунтахаби Марокко ва финалисти Ҷоми ҷаҳон-2018 Хорватия мусовӣ 0:0 анҷом ёфт.
Аммо қаҳрамони чоркарати футболти ҷаҳон, мунтахаби Германия аз мунтахаби Ҷопон бо ҳисоби 1:2 шикаст хӯрд.
Мухлисони футбол шикасти дастаи Германияро аз Ҷопон ба шикасти Аргентина аз Арабистони Саудӣ монанд карда, онро ғайриинтизор номиданд.
Ҷоми ҷаҳонии футбол-2022 дар давлати Қатар аз 20-уми ноябр оғоз шуда, финали қаҳрамонӣ рӯзи 18-уми декабр дар Варзишгоҳи миллии Лусаил, ки дорои 80 ҳазор ҷойи нишаст барои тамошобинон аст, баргузор хоҳад шуд.
