Cухангӯи Гурӯҳи Толибон, Забиҳуллоҳи Муҷоҳид бо нашри паёме ба дархости Раёсати Ҷумҳурии Афғонистон барои таваққуфи хушунатҳо ва шурӯи музокирот посух дод. Дар ин бора хабаргузории “Орёно нюз” хабар медиҳад.
Сухангӯи гурӯҳи Толибон бо нашри паёме дар твиттер гуфтааст, ки дархости таваққуфи ҷанг пеш аз шурӯи музокирот ғайри мантиқӣ аст.
Сиддиқ Сиддиқӣ, сухангӯи раёсати Ҷумҳурии Афғонистон дар твиттераш навишта, ки афзоиши хушунатҳои Толибон умеду интизори мардум ва ҷомеаи ҷаҳониро барои сулҳ хадшадор мекунад ва замони он расидааст то Гурӯҳи Толибон даст аз хушунат бардорад ва вориди раванди сулҳ шавад.
Аммо дар ради ин навишта сухангӯи Гурӯҳи Толибон, Забиҳуллоҳи Муҷоҳид гуфтааст, ки татбиқи тавофуқномаи сулҳи Давҳа ба хотире зарур аст, ки барои коҳиши хушунат ва поёни ҷанг роҳе ҷуста шавад.
Роҳи ҳалли ниҳоӣ аз нигоҳи Гурӯҳи Толибон ин раҳоӣ намудани зиндониёни онҳост. Дар ин замина Забиҳуллоҳи Муҷоҳид хотирнишон кардааст, ки “бояд ҳарчи зудтар раванди раҳоии зиндониён такмил ва музокироти байниафғонӣ шурӯъ шавад”. Ба гуфтаи ӯ ин танҳо роҳи ҳал ва мавзеъгирии мантиқӣ аст.
