Пас аз даргириҳои мусаллаҳонаи рӯзи 29 апрел дар марзи Тоҷикистону Қирғизистон дар Ҷамоати Хоҷаи Аъло, Ворухи Исфара ва Овчи-Қалъаи Бобоҷон Ғафуров имрӯз 30 апрел вазъ нисбатан ором аст.
Бино ба гуфтаи Мавҷуда Ғафурова, мудираи кӯдакистони рақами 13-и деҳаи Овчӣ, рӯзи гузашта занону кӯдакони маҳалла ба ҷойҳои бехавф кӯчноида шуда буданд, имрӯз сокинон ба хонаҳои худ баргаштанд, вале кӯдаконро барои эҳтиёт ба мактабу кӯдакистон набурданд.
Бино ба навиштаи гурӯҳи фейсбукии “Ҳақиқати Суғд”, рӯзи гузашта пас аз нисфирӯзӣ ва тамоми шаб вазъ дар маҳалла ором буд ва мақомоти қудратӣ назорат мебурданд.
Имрӯз низ ҳама ҷо ором аст ва мардум ба манзилҳои худ баргашта истодаанд.
Ғафурова таъкид дошт, ки мардуми ду халқ пеш аз ин ягон маротиба бо ҳам муноқиша накардаанд. “Ҳатто, қирғизҳо тамоми хариди озуқаи худро аз бозори деҳаи Овчӣ мекунанд. Мо, сокинони деҳа ба омаду рафти қирғизҳо ягон норозигӣ ва ё нобоварӣ ифода накардаем”, мегӯяд Мавҷуда Ғафурова.
Ҳамзамон имрӯз корбарон аз деҳаи Овчи ба “Аздо тв” наворҳо фиристоданд, ки дида мешавад сарбозони тоҷик ҳамроҳ бо сокинони маҳалла дар деҳаҳо машғули амалиёти низоми ҳастанд.
Ёдовар мешавем, ки рӯзи 28 апрел дар Ҷамоати деҳоти Хоҷаи Аъло шаҳри Исфара байни сокинони ду тараф сари маркази обтақсимкунии “Галавной” муноқиша сар зад. Дар ибтидо мардум байни ҳам сангпартоӣ карданд, вале рӯзи 29 апрел муноқиша ба тирпарронӣ ва даргирии шадид табдил шуд. Пас аз Хоҷаи Аъло даргирӣ низ дар Ворух ва Овчи-Қалъаи ноҳияи Бобоҷон Ғафуров низ шуруъ шуд, ки бо дахолати мақомоти баландпояи ду тараф вазъ нисбатан ором карда шуд.
