Вазири дифои Қирғизистон Бактибек Бекболотов рӯзи 19-уми октябр дар Бишкек ҳангоми суҳбат бо хабарнигорон гуфт, ки сулҳ байни Тоҷикистону Қирғизистон ба осонӣ ба даст намеояд.
Тарвре расонаҳои қирғизӣ хабар медиҳанд, Бекболотов гуфта, ки то дар ҷараёни сулҳ як ҳайати доварон аз ниҳодҳои байналмилалии хориҷӣ, ба хусус Созмони Паймони Амнияти Дастаҷамъӣ (СПАД) дар ин кор довар нашаванд, байни ин ду кишвари ҳамсоя сулҳ намешавад ва мухолифатҳо идома хоҳанд дошт.
Ӯ иллати адами созиш байни тоҷикону қирғизҳоро дар он мебинад, ки ҳарду тараф ҳам барои худ далелҳо доранд ва то довари бетарафе дар байн набошад, наметавон далели тараферо рад кард.
“Чуноне ки медонед, ман чанде пеш бо дабири кулли СПАД Станислав Зас мулоқот доштам. Ман ба ӯ гуфтам, ки миёни қирғизу тоҷик сулҳ ба вуҷуд намеояд. Зеро қиргизҳо ҳам хакикати худро доранд ва тоҷикҳо низ далоили худро. То миёни мо довар наояд, сулҳ нахоҳад шуд.”, – мегӯя Бекболотов.
Вазири дифои Қирғизистон меафзояд, агар доварони СПАД тавонанд ду мушкилиро дар минтақаҳои баҳсбарангези мо як ҳал кунанд, пас мо метавонем сулҳро ба даст биёрем. Яке ин ки: оташбасро назорат кунанд ва дигар ин ки силоҳҳои вазнинро бо ҳадафи сулҳ аз минтақаҳои низоъ берун биоранд.
Ба гуфтаи ӯ, пас аз ҳалли ин ду мушкилӣ метавон ба масъалаҳои сиёсӣ ва таъйину аломатгузории марз низ даст ёфт. “Ин вазъ 30 сол не, балки 98 сол боз идома дорад”, – гуфт ӯ.
Ин дар ҳолест, ки расиҷумҳурони Тоҷикистону Қирғизистон бо ташаббуси Русия дар нишасти сеҷониба дар шаҳри Остона дар мавриди низоъҳои марзӣ гуфтугӯ карданд.
Дар ин нишаст таъкид шуд, ки бояд ба тавофуқоти имзошуда амал карда шавад. Раисҷумҳури Русия Владимир Путин ҳам ваъда дод, ки омодааст дар ором кардани вазъ ва сулҳ овардан байни ин ду кишвар кумак кунад.
