Вазорати кишоварзии Тоҷикистон барои арзон шудани нархи сабзӣ ҳосили тобистонаи деҳқононро интизор аст.
Бино ба навиштаи гурӯҳи фейсбукии “Ахбор-Плюс”, вазири кишоварзии Тоҷикистон Сулаймон Зиёзода дар нишасти матбуотии ниҳодаш ба гароншавии нархи сабзӣ ишора кард ва ваъда дод, ки арзиши ин маҳсулоти хӯрокаро арзон хоҳад кард.
Вазири кишоварзӣ сабаби болоравии нархи сабзиро дар Тоҷикистон ба сардиҳои зимистони гузашта рабт дод ва афзуд, ки ин боиси кам шудани кишти зироати ин маҳсулот дар кишвар шудааст.
Ба гуфтаи ӯ, “соли гузашта сабзӣ дар Тоҷикистон нархи бисёр паст дошт ва ба наздикӣ ҳам нархи он пойин мешавад ва ҳосили нави сабзӣ дар роҳ аст”.
Ёдовар мешавем, ки имсол нархи сабзӣ дар бозорҳои Тоҷикистон то 11 сомонӣ боло рафт, ки он нигаронии мардумро ба бор овард. Сабзӣ яке аз маҳсулоти серистиъмол барои мардуми Тоҷикистон ба ҳисоб меравад.
Гуфтанист, 12-уми июл нишастҳои матбуотии вазорату идораҳои Тоҷикистон шуруъ шуд. Дар рӯзи аввал чанд вазорат, аз ҷумла Вазорати адлия ва Вазорати кишоварзӣ нишатсҳои матбуотии худро доир карданд.
