Вазири сохтмон ва хоҷагии манзилӣ-коммуналии Русия Ирек Файзуллин рӯзи сешанбе дар “ҳафтаи сохтмон”-и Русия ба рӯзноманигорон гуфт, ки айни замон дар Русия ҳадди аққал як миллиону 200 ҳазор нафар бинокорон намерасад.
Ҳамчунин Вазир қайд кард, ки дар Русия мушкилоти кадрӣ вуҷуд дошта, шумораи зиёди бинокорон, ки аз кишварҳои ҳамсоя омада буданд бо сабаби коронавирус маҷбур шуданд, ки ба ватанашон баргарданд.
Дар як суҳбат ба хабаргузории “ТАСС” дар моҳи феврал муовини Вазири сохтмон ва хоҷагии манзилӣ-коммуналии Русия Никита Стасишин гуфта буд, ки тақрибан 14 ҳазор муҳоҷир, асосан аз Ӯзбекистон, Тоҷикистон ва Қазоқистон, аз моҳи декабри соли 2020 барои кор дар сохтмонҳо ба Русия омадаанд.
Тартиби соддакардашуда барои ворид намудани гурӯҳи муҳоҷирон ба Русия барои кор дар сохтмонҳо равона шудааст. Ҳамчунин пудратчӣ вазифадор аст қонунгузории амалкунандаи Федератсияи Русияро риоя кунад ва назорати санитарию эпидемиологиро таъмин намояд.
Қаблан Президенти Русия Владимир Путин ба ҳукумати Русия дастур дода буд, ки ҷалби муҳоҷирони меҳнатиро ба сохтмонҳо то 1 марти соли 2021 бо риояи талаботи санитарию эпидемиологӣ содда кунанд.
