Вазорати корҳои дохилаи Тоҷикистон 12 август хабар дод, ки ду нафарро бо гумони даст доштан дар қатли 4 узви як хонавода – падари 39-сола ва се фарзанди ноболиғи 8, 13 ва 14-соларо дар ноҳияи Ҷайҳун дастгир кардааст.
Бино ба иттилои ВКД, кормандони милитсаяи ноҳияи Ҷайҳун ду марди 37 ва 33-соларо бо гумони даст доштан дар ин ҷинояти мудҳиш боздошт кардаанд, ки ҳарду сокинони ҷамоати деҳоти Қумсангири ноҳияи мазкур мебошанд.
Вазорат дар ин маврид маълумоти бештар надодааст. Ва маълум нест, ки омили аслии ин куштор кӣ ва ё чӣ будааст. Инчунин ному насаби боздоштшудаҳо ва назари онҳо низ дастрас нест.
Вазорати корҳои дохилаи Тоҷикистон дар ҳоле аз боздошти ду нафар хабар дод, ки Рамазон Раҳимзода, вазири корҳои дохила дар нишасти матбуотии як ҳафта пешаш, 4-уми август аз боздошти ду нафар дар ин қазия гуфта буд. Вале маълум нест, ки сомонаи вазорат аз ҳамон боздоштшудаҳо мегӯяд ва ё ин нафарро нав дастгир кардаанд.
Ёдовар мешавем, ки шаби 12-уми июни соли ҷорӣ ба хонаи Аҳлиддин Маҳмадов, сокини 39-солаи ноҳияи Ҷайҳун ҳамла сурат гирифт, ки дар натиҷа, худи ӯ ва се фарзанди ноболиғаш ба қатл расонида шуданд. Аммо ҳамсари ӯ, Латофат Азизова бо писараш бо ҷароҳатҳои вазнин ба беморхона интиқол дода шуданд. Сабабҳои ин куштори мудҳиш то ҳанӯз рӯшан нашудааст.
Ҳодисаи мазкур баҳсҳои зиёдеро дар шабакаҳои иҷтимоӣ ва доираҳои мухталифи ҷомеа ба бор овардааст. Баъзеҳо маъмурони милиса ва тафтишотиро ба нотавонӣ муттаҳам намуда, мегӯянд, ки нерӯҳои интизимӣ ва тафтишотӣ дар кашфи ин ҷиноят оҷиз мондаанд, аммо даҳҳо ва садҳо нафари бегуноҳро бо иттиҳоми террористӣ барои солҳои тӯлонӣ равонаи зиндон кардаанд.
