Рамазон Раҳимзода, вазири корҳои дохилии Тоҷикистон зимни нишасти матбуотии ниҳодаш рӯзи 4-уми август гуфт, ки нисбати ҷинояти куштори 4 нафар аз як оила дар ноҳияи Ҷайҳун ду нафарро бо гумони даст доштан дар ин ҷинояти мудҳиш дастгир кардаанд.
Ин дар ҳолест, ки вазорат дар омораш аз дастгир шудани 143 нафар бо гумони афроди вобаста ба гурӯҳҳои террористӣ давоми шаш моҳи ахир хабар дод, вале аз ин ҷинояти мудҳиш ду моҳ мегузарад ҳанӯз қотили он мушаххас нашудааст.
Ёдовар мешавем, ки шаби 12-уми июни соли ҷорӣ ба хонаи Аҳлиддин Маҳмадов, сокини 39-солаи ноҳияи Ҷайҳун ҳамла сурат гирифт, ки дар натиҷа, худи ӯ ва се фарзанди ноболиғаш ба қатл расонида шуданд. Аммо ҳамсари ӯ, Латофат Азизова бо писараш бо ҷароҳатҳои вазнин ба беморхона интиқол дода шуданд. Сабабҳои ин куштори мудҳиш то ҳанӯз рӯшан нашудааст.
Ҳодисаи мазкур баҳсҳои зиёдеро дар шабакаҳои иҷтимоӣ ва доираҳои мухталифи ҷомеа ба бор овардааст. Баъзеҳо маъмурони милиса ва тафтишотиро ба нотавонӣ муттаҳам намуда, мегӯянд, ки нерӯҳои интизимоӣ ва тафтишотӣ дар кашфи ин ҷиноят оҷиз мондаанд, аммо даҳҳо ва садҳо нафари бегуноҳро бо иттиҳоми террористӣ барои солҳои тӯлонӣ равонаи зиндон кардаанд.
