Раҳбари Паймони миллии Тоҷикистон Муҳиддин Кабирӣ дар нишасти САҲА аз марзбонони тоҷик, ки аз ҷониби намояндаи Қирғизистон “таҷовузкор” хонда шуданд, дифоъ кард.
Имрӯз, 4-уми октябри соли 2022, Муҳиддин Кабирӣ, раҳбари Паймони миллии Тоҷикистон дар рафти баргузории ҷаласаҳои Созмони Амният ва Ҳамкории Аврупо (САҲА) дар Варашава қотеона аз афсарону сарбозони Тоҷикистон ҳимоят карда, гуфт, ки онҳо дар марз вазифа ва қарзи шаҳрвандии худро иҷро мекунанд.
Раиси ПМТ ва ҳамзамон раҳбари Ҳизби наҳзати исломии Тоҷикистон замоне аз марзбонони тоҷик дифоъ кард, ки дар нишасти имрӯзаи САҲА, ки вобаста ба мавзуи шиканҷа буд, яке аз фаъолони Қирғизистон бо номи Айдар Содиқов Тоҷикистонро таҷовузкор хонда, таъкид кард, ки афсарону сарбозони тоҷик ба ҳудуди маъмурии Қирғизистон таҷовуз карданд.
Айдар Содиқов гуфт, ки афсарону сарбозони тоҷик хонаҳои мардумро оташ заданд, мактабҳо ва дигар иншооти ҷамъиятро мавриди ҳамла қарор доданд ва асиронро шиканҷа карданд. Аз ҷониби Тоҷикистон алайҳи Қирғизистон ҳамлаҳои густурдаи иттилоотиро роҳандозӣ намуданд. Дар ҳодисаҳои сентябри соли ҷорӣ 60 нафар, аз он ҷумла занону кӯдакони Қирғизистон кушта шуданд.
Аммо Муҳиддин Кабирӣ дар хитоб ба ҷониби Қирғизистон таъкид кард, ки мо дар хусуси он ки Тоҷикистонро як диктатор ва як режими худкома идора мекунад, розӣ ҳастем, вале ба ҳеч ваҷҳ розӣ буда наметавонем, ки дар ин ҳодисаҳо яктарафа Тоҷикистонро айбдор кунанд.
Ба гуфтаи раҳбари Паймони миллии Тоҷикистон қурбониёни ҳодисаҳои назди марзӣ дар ҳар ду тараф вуҷуд доранд. Ба ин ҳодиса яктарафа баҳо додан иштибоҳ аст. Бар илова, афсарону сарбозони Тоҷикистон таҷовузкор нестанд, онҳо дар вақти низоъ қарзи шаҳрвандии худро дар ҳифзи марзу бумашон иҷро карданд.
Дар ин нишаст, ки навбати суханронӣ баъд аз Айдар Содиқов ба раҳбари Паймони миллии Тоҷикистон дода шуд, ӯ билофосила ба иттиҳомоти ҷониби Қирғизистон вокуниш карда, гуфт, ки мо ҳам ҷонибдори онем, ки САҲА дар раванди муайян кардани хатти марз кумак кунад ва инчунин талаб кард, ки вазъият дар марзҳои муштараки Тоҷикистону Қирғизистонро ҳам як комиссияи мустақил мавриди таҳқиқ қарор бидиҳад.
