Михаил Горбачёв, собиқ раҳбари Иттиҳоди Ҷумҳуриҳои Шӯравии Сосиалистӣ бар асари бемории тӯлоние дар синни 91-солагӣ дар Русия вафот кард.
Шоми дирӯз, 30-юми августи соли 2022 Михаил Горбачёв Сергеевич, 8-умин ва охирин раҳбари собиқ Иттиҳоди Ҷумҳуриҳои Шӯравии Сосиалистӣ дар бистари беморӣ ҷони худро аз даст дод. Вафоти ӯ вокунишҳои зиёдеро дар дунё, аз он ҷумла дар байни тоҷикистониҳо низ ба бор овардааст.
Фаъолони сиёсӣ ва фарҳангии тоҷик вобаста ба шинохт ва бардоштҳои худ аз корномаи “меъмори бозсозӣ” дар солҳои 1985-1991 дар шабакаҳои иҷтимоӣ дар бораи марг ва корномаи ӯ матолиби мухталифе нигоштаанд ва дар маҷмуъ метавон афкори онҳоро ба се гурӯҳ тақсим кард:
а) Дар гурӯҳи аввал асосан онҳое дохил мешаванд, ки бо сароҳат аз шаҳомат ва барномаҳои кории Михаил Горбачёв, ки мунҷар ба барҳам хӯрдани Иттиҳоди Ҷумҳуриҳои Шӯравии Сосиалистӣ ва истиқололи 15 давлати узви он гардид, биноан аз ӯ ситоиш мекунанд.
б) Дар гурӯҳи дуввум аксар он идда аз русгароҳое шомил мешаванд, ки аз як нигоҳ, калонсолу аз сӯи дигар шефтаи низоми коммунистӣ ва як замоне ҳам муътақид ба он буданд, ки Иттиҳоди Ҷумҳуриҳои Шӯравӣ то абад боқӣ хоҳад монд, ба ин хотир аз вай танқид мекунанд.
в) Гурӯҳи сеюм, бо шумули президент Эмомалӣ Раҳмон ва дар асл онҳое ҳастанд, ки аз фурсатҳои фароҳам овардаи Михаил Горбачёв Сергеевич дар таъмин ва туҳфа кардани истиқлоли давлат то тавонистанд ба нафъ ва ё бар зарири мардум кор карданд, вале акнун пас аз маргаш бо ирсоли тасаллиятномаҳои хушку холӣ аз таърифу танқид аз худашон дарак дода, хитоб ба пайвандони вай мегӯянд, “дар ин лаҳзаҳои ҳузнангез ба онҳо сабри ҷамил хоҳонем.”
Бо ин вуҷуд, иддае ҳам вуҷуд дорад, ки ҳама бадбахтиҳо ва нокомиҳои худ дар замони 31 соли истиқлолро дар ватанашон бар дӯши Михаил Горбачёв партофта, борони танқиду ҳақоратҳоро низ болои ӯ раво донистаанд. Аз нигоҳи камият, афроди ин гурӯҳ, аз се гурӯҳи асосӣ, ки пештар дар бораи онҳо ишора шуд, теъдодашон зиёдтар аст. Ҷамъи онҳо асосан аз оммаи мардуми меҳнаткаше аст, ки дар ин 30 соли ахир аз ҳукуматдорони худ ҷабру зулми зиёд дидаанд.
Гуфта мешавад, Михаил Горбачёв, собиқ раҳбари Иттиҳоди Ҷумҳуриҳои Шӯравӣ дар замони 6 соли раҳбариаш ислоҳоти иқтисодӣ ва озодиҳои шаҳрвандии зиёдеро барои мардум ба вуҷуд оварда буд.
Дар ин миён касоне, ки хостанд идораи давлатдорӣ дар кишварҳои худро ба нафъи миллатҳои худ анҷом диҳанд, бурд карданд, вале онҳое, ки мисли Тоҷикистон ҳузури худро аз зери сояи Русия дур кардан нахостанд, ҳамоно дар фақру тангдастӣ дасту панҷа нарм мекунанд.
Амруллоҳи Низом, махсус барои Azda tv
