Иддае аз волидони донишҷӯёни тоҷикистонии макотиби олии Русия мегӯянд, ки вуруди фарзандони онҳо ба қаламрави Русия мушикил шудааст.
Ба гуфтаи бархе волидони донишҷӯёни тоҷик, ки фарзандонашон дар макотиби олии Русия таҳсил мекунанд, аз рӯзи 26-уми август шоҳиди он будаанд, ки мақомоти Русия монеи вуруди фарзандони онҳо ба хоки Русия мешаванд.
Дар ин баҳсҳо, ки дар гурӯҳи фейсбукии “Tajik Mama Group” идома дорад, хеле аз иштирокчиён таъкид карда мегӯянд, фарзандони онҳо, ки донишҷӯёни донишгоҳҳои Русия ҳастанд, ҳангоми ворид шудан ба қаламрави ин кишвар 5-6 соат мавриди тафтишу таҳқиқ ва пурсуҷӯи кормандони мақомоти Русия қарор мегиранд.
Ба қавли онҳо, мақомоти Русия ҳангоми вуруди донишҷӯён ба қаламрави Русия соатҳо онҳоро мавриди бозпурсӣ қарор дода, баъзеро иҷозат медиҳанд, ки дохил шаванд, вале баъзеҳои дигарро дубора ба ватан бармегардонанд.
Гуфта мешавад, тибқи оморҳои расмӣ, Тоҷикистон ба сурати расмӣ дар кишварҳои хориҷ зиёда аз 41 ҳазору 200 донишҷӯ дорад, ки қисми зиёде аз онҳо дар мактабҳои олии Русия таҳсил мекунанд. Теъдоди донишҷӯёни тоҷикистонӣ дар мактабҳои олии Русия 33 ҳазору 178 нафарро ташкил медиҳанд.
Пеш аз ин ҳам вуруди шаҳрвандони Тоҷикистон ба Русия осон набуд. Мақомоти Русия ҳангоми вуруд нисбати шаҳрвандони кишварҳои Осиёи Марказӣ таъбизҳои нонавишатаеро ҷорӣ карда буданд. Онҳоро пас аз соатҳои тӯлонӣ интизор гузоштан ба дохили ин кишвар роҳ медоданд, аммо баъд аз ҳамлаҳои хунин ба “Крокус Сити Ҳол” мақомоти Русия дар умум вуруди ҳамаи тоҷикистониҳоро боз ҳам сахттар кардаанд.
