Мавлавӣ Муҳаммадалӣ Файзмуҳаммад, зиндонии сиёсӣ ва узви Раёсати олии Ҳизби наҳзати исломии Тоҷикистон бино ба вазъи бади саломатӣ аз зиндон ба бемористони “Қрияи боло” интиқол ёфтааст.
Бино ба иттилои манобеи Azda tv, 29-уми марти соли ҷорӣ вазъи саломатии ин зиндонии сиёсӣ вахим шуда, ӯро ба бемористони шаҳрӣ интиқол дода, онҷо бистарӣ карданд.
Саидисҳоқ Бобоев, узви Паймони миллии Тоҷикистон дар истинод ба яке аз наздикони ин зиндонии сиёсӣ ба Azda tv гуфт, “Мавлавӣ Муҳаммадалии Файзмуҳаммад аз бемории қанд ранҷ мебурд ва ҳоло ин бемори шиддат гирифта, ба қалбаш ҳам таъсир расондааст. Ӯро аввал дар бемористони дохили зиндон бистарӣ карданд, вале пас аз шиддат гирифтани беморӣ ҳоло ӯро ба бемористони шаҳрии “Қарияи боло” интиқол додаанд.”
Ба қавли манбаъ, ин узви аршади ҲНИТ-ро дар бемористон ду посбон назорат мекунанд. Манбаъ, афзуд, ки бемории оқои Муҳаммадалӣ хеле ҷиддӣ буда, “ҳатто як пояш комилан аз кор мондааст”. Гуфта мешавад, Муҳаммадлӣ Файзмуҳаммадро пештар ҳам ба сабаби ин беморӣ дар бемористони дохили зиндон бистарӣ карда буданд.
Ёдовар мешавем, ки мақомоти Тоҷикистон сентябри соли 2015 Муҳаммадалии Файзмуҳамади 65-соларо ҳамроҳ бо дигар раҳбарон ва аъзои аршади ҲНИТ боздошт карда, баъдан ба 23 соли зиндон маҳкум кард.
