Додситонии кулли Тоҷикистон ба ҳам рабт доштани боздошти чанде аз чеҳраҳои шинохтаи кишварро тасдиқ кард.
Юсуф Раҳмон, Додситони кулли Тоҷикистон дар нишасти матбуотии рӯзи 9-уми август гуфт, ки нисбати Саидҷаъфар Усмонзода, вакили пешини порлумон ва собиқ раиси Ҳизби демократи Тоҷикистон ва муовини аввали раиси ин ҳизб Аҳмадшоҳ Комилзода, инчунин Шокирҷон Ҳакимов, муовини аввали раиси Ҳизби сотсиал-демократ, Акбаршоҳ Искандаров, собиқ раиси Шӯрои олӣ ва Ҳамроҳхон Зарифӣ, собиқ вазири корҳои хориҷӣ, парвандаҳои ҷиноятӣ оғоз шуда, тафтишот идома дорад.
Юсуф Раҳмон дар посух ба суол, ки “оё ин парвандаҳо бо ҳам рабт доранд”, гуфт: “бале ва дар алоқамандии зич қарор доштанд”.
Аммо ин мақомдор барои фош нашудани сирри тафтишот, чун парвандаҳо муҳри махфӣ доранд, аз додани ҷузъиёти бештар худдорӣ кард.
Ин дар ҳолест, ки Юсуф Раҳмон вақте аз парлумон бекор кардани дахлнопазирии вакилии Саидҷаъфар Усмонзодаро дархост мекард, гуфта буд, ки алайҳи ӯ бо иттиҳоми “бо зӯроварӣ ғасб намудани ҳокимият” ё моддаи 306 қисми 2 банди “в”-и Кодекси ҷиноятии Ҷумҳурии Тоҷикистон парвандаи ҷиноятӣ кушода шудааст.
Дар идома нишасти матбуотии имрӯза Додситони кулли Тоҷикистон таъкид кард, “касе, ки ба давлат, ба миллат, ба президент хиёнат мекунад, дар назди қонун ҷавоб медиҳад, новобаста ба он ки чӣ вазифа дорад ва дар гузашта чӣ вазифа ишғол карда буд”.
Ёдовар мешавем, ки боздошти чанд сиёсатмадор ва мақомдори собиқ дар Тоҷикистон, аз 12-уми июни слли ҷорӣ оғоз шуд, ки то ҳол аз боздоштшудаҳо номи Саидҷаъфар Усмонзода, Аҳмадшоҳ Комилзода, Шокирҷон Ҳакимов, Акбаршоҳ Искандаров ва Ҳамроҳхон Зарифӣ расонаӣ шудаанд.
Мақомот ин афродро ба ҳамкорӣ бо раҳбарони Паймони миллии Тоҷикистон ва барои маслиҳати пешакӣ ҷиҳати ғасби ҳокимияти давлатӣ дар Тоҷикистон гунаҳкор медонанд. Ин иттиҳомро раҳбарони ПМТ рад карда буданд.
Назари худи боздоштшудаҳо ва вакилони дифои онҳо дар мавриди иттиҳоми мақомот маълум нест.
Ҳатто наздикони ин афрод гуфта буданд, ки аз рӯзи боздошт то кунун муваффақ нашудаанд, ки онҳоро бинанд ва аз шароити будубошу саломатии онҳо хабаре надоранд. Инчунин то кунун на ҳама боздоштшудаҳо вакили дифоъ доранд.
Ба навиштаи Радиои Озодӣ, ба ҷуз вакили дифои давлатӣ, дар ҳоли ҳозир танҳо Акбаршоҳ Искандаров ва Шокирҷон Ҳакимов вакилони дифои мустақил доранд ва вакилони дифоъ низ муваффақ нашудаанд, ки бо зерҳимояҳои худ дар боздоштгоҳ мулоқот кунанд ва дар ҷараёни бозпурсиҳо танҳо вакили дифои давлатӣ ҳаққи ширкатро доштааст.
Ҳоло мақомоти Тоҷикистон ҳисобҳои бонкии Саидҷаъфар Усмонзода, Акбаршоҳ Искандаров, Ҳамроҳхон Зарифӣ, Аҳмадшоҳ Комилзода ва Шокирҷон Ҳакимовро бастанд ва инчунин болои наздиконашон фишор овардаанд, ки онҳо ҳаққи фурӯхтан ё ба иҷора додани хона, бӯстонсаро, ширкат, мошин ва амволи дигарро надоранд.
