Собиқ додситони кул ва қудои раисҷумҳури Тоҷикистон Юсуф Раҳмон дабири Шӯрои амнияти кишвар таъйин шуд.
Фармони ба ин вазифа таъйин кардани ӯро раисҷумҳури худкомаи Тоҷикистон Эмомалӣ Раҳмон рӯзи 4-уми феврал содир кардааст.
Одатан дар Тоҷикистон мақомдорони қудратӣ пас аз расидан ба синни бознишастагӣ барои кор дар Шӯрои амнияти кишвар фиристода мешаванд, вале индафъа ба ин мақом таъйин шудани Юсуф Раҳмони 58-сола суолҳои зиёдеро дар ҷомеа ба бор овардааст.
Юсуф Раҳмон, ки беш аз даҳ сол додситони кулли кишвар буд, 23-юми январи соли ҷорӣ аз мақомаш барканор шуда буд.
Дертар Маҷлиси миллии Маҷлиси Олии Ҷумҳурии Тоҷикистон бо роҳбарии Рустами Эмомалӣ пешниҳоди Эмомалӣ Раҳмонро дар мавриди барканории Юсуф Раҳмон қабул кард.
Инчунин аъзои Маҷлиси миллии кишвар розӣ шуданд, ки Ҳабибулло Воҳидзодаи 60-сола додситони кулли кишвар таъйин шавад.
Дар замони раҳбарии Юсуф Раҳмон ин ниҳоди қазоии кишвар ба ниҳоди саркӯбгари мухолифону озодии баён табдил ёфта, дар Тоҷикистон боздоштҳои дастҷамъӣ, ҳукмҳои дарозмуддат, зиндонӣ шудани фаъолону хабарнигорон бештар шуда буд.
