Субҳи имрӯз боз як заминларзаи ҷадиде дар шарқи Туркия ба қайд гирифта шуд, вале шиддати он камтар аз заминларзаҳои субҳи дирӯз арзёбӣ мешавад.
Бино ба иттилои расонаҳо, субҳи имрӯз, 07-уми феврали соли 2023, боз як заминларзаи дигар шарқи Туркияро такон дод, вале то ҳол дар бораи омори зиёну зарарҳои он расман иттилоъ дода нашудааст.
Ба қавли Маркази заминларзашиносии Аврупо, заминҷунбии субҳи имрӯз ба бузургии 5,7 дараҷа тибқи ҷадвали Рихтер ба қайд гирифта шудааст. Ин заминларза дар минтақаҳои то 60 километрии марзи Сурия ба вуқуъ пайваста, қисматҳое аз ин кишварро низ такон додааст.
Гуфта мешавад, субҳи дирӯз ду заминларзаи шадиде ҷануби Туркия ва шимолу ғарби Сурияро такон дод ва тибқи охирин оморҳо дар натиҷа беш аз панҷ ҳазор нафар ҷони худро аз даст дода, ҳазорҳо каси дигар маҷруҳ ва зери оворҳо монда, беному нишон гардидаанд.
Ин дар ҳолест, ки Созмони ҷаҳонии беҳдошт эълон кардааст, эҳтимол меравад бар асари заминларзаи субҳи дирӯз, ки қисматҳое аз Туркия, Сурия, Ироқ, Лубнон, Қубрус, Юнон ва ҳатто Мисрро такон дод, ҳудуд 23 миллион одам зарар дидааст. Барои наҷоти онҳое, ки зери оворҳо монда беному нишон гардидаанд, аз тамоми имконот бояд истифода карда шавад.
