Байни гурӯҳе аз муҳоҷирони корӣ, ки дар минтақаи саноатии Рудневои шаҳри Маскав дар дохили як бино кор мекарданд, занозанӣ рух дод. Дар ин бора расонаҳои маҳаллӣ хабар доданд.
Дар шабакаи иҷтимоии ВКонтакте наворе нашр шуда, ки дида мешавад беш аз 60 муҳоҷири корӣ байни ҳам даргир шуда, аз чӯбу калтак ва дигар ашёи сохтмонӣ истифода мекунанд.
Гуфта мешавад, шоҳидони айнӣ ҳодисаро ба навор гирифта ва дар шабакаи иҷтимоии ВКонтакте нашр карданд.
Дар навори муноқиша дида мешавад, ки муҳоҷирон бо чӯбу калтак ба ҷони ҳамдигар дарафтода дашном медиҳанд. Агарчи садояшон хуб фаҳмо нест, вале зоҳиран чунин шунида мешавад, ки касе бо забони тоҷикӣ мегӯяд “бизан, бизан”.
Расонаҳои маҳаллӣ аз қавли шоҳидон нақл мекунанд, ки иллати муноқиша дар он буда, ки як гурӯҳи сохтмончиён тамоми корҳоро анҷом медодаанд ва гурӯҳи дигар кор намекардаанд ва ин боиси занозанӣ байни онҳо шудааст.
То ҳол мақомоти шаҳри Маскав дар ин бора расман чизе нагуфтаанд. Дар бораи талафоти ҷонӣ низ гузорише нест.
Қаблан гузорише дар баораи задухурди муҳоҷирон нашр шуда буд, ки маъмурони интизомӣ шаҳри Маскав 120 муҳоҷири тоҷикистонӣ ва узбекистониро барои занозании оммавӣ дар сохтмоне дар соҳили Шелепихинская дар Маскав боздошт карда буданд.
