Дар як тарабхонаи шаҳри Душанбе писарони мансабдорон байни худ занозанӣ ва кордкашӣ кардаанд, ки дар натиҷа баъзе захмӣ ҳам шудааст.
Вазорати корҳои дохилии Тоҷикистон аз рӯи ҷанҷолу занозании шоми 11-уми ноябр, ки дар он Зафарҷон Самӣ, сардори толори VIP-и Фурӯдгоҳи байналмилалии Душанбе ва писари раиси ноҳияи Исмоили Сомонӣ Шариф Самӣ аз корд ҷароҳат бардошт, парвандаи ҷиноӣ боз кардааст.
Тавре “Asia-Plus” хабар медиҳад, ВКД аз рӯи моддаи “авбошӣ” парванда боз карда, шахсияти афроди дар ҷанҷол дастдоштаро муайян мекунад ва барои боздошти онҳо чора меандешад.
Гуфта мешавад, шоми 11-уми ноябри соли ҷорӣ, дар назди яке аз тарабхонаҳои пойтахт дар маҳаллаи 112-ум занозанӣ рух медиҳад, ки дар натиҷа Зафарҷон Самӣ ба сараш се зарби корд хӯрда, захмӣ мешавад.
Сабаби муноқиша то ҳол маълум нест ва гуфта нашудааст, ки ин занозанӣ бо айби кӣ сар задааст.
Нусратулло Маҳмудзода, сухангӯи Вазорати корҳои дохилии Тоҷикистон, рӯзи 15-уми ноябр ба Радиои Озодӣ занозаниро як авбошӣ номида гуфтааст, ки “гумонбарон муайян ҳастанд ва дастрас мешаванд. Ин ҳодисаи ногаҳонӣ аст. Ба вазифаи падару писар дахл надорад. Парвандаи ҷиноӣ боз шудааст, тафтиш идома дорад”.
Номи гумонбарон дастраси расонаҳо нест, мақомот низ бо баҳонаи “халал нарасондан ба тафтишот” аз гирифтани номи онҳо худдорӣ мекунанд. Аммо ба иттилои манобеи Радиои Озодӣ тарафи дигари ҷанҷол низ шахси наздик ба мансабдорон ҳаст.
Зафарҷон Самӣ 24-сол дошта, сардори толори VIP-и Фурудгоҳи байналмилалии Душанбе ва писари раиси ноҳияи Исмоили Сомонӣ Шариф Самӣ мебошад.
Шариф Самӣ, ки дар гузашта раиси ширкати “Барқи Тоҷик” ва раиси шаҳри Бохтар (собиқ Қӯрғонтеппа) буд, ҳодисаи зарб хӯрдани писарашро дар як муноқиша тасдиқ ва ё рад накарда, ба Радиои Озодӣ гуфтааст, ки “Ягон гап нест, ҳама тинҷ аст. Вазорати корҳои дохилӣ чизе гӯяд, ҳамон. Ман дар кор ҳастам.”
Дар Тоҷикистон бо иштироки фарзандони мансабдорон ва ҳатто наздикони Эмомалӣ Раҳмон ҷиноятҳои зиёде содир мешавад. Аммо дар аксар ҳолат он ҷиноятҳо аз чашми мардум ва расонаҳо пӯшонда мешаванд ва ё агар расонаӣ ҳам шаванд, парвандаашон аз ҷониби кормандони мақомот ҷиддӣ таҳқиқ намешаванд.
Дар гузашта барои содир кардани ҷиноят номҳои Алишер ва Диловар Гуловҳо, писарони вазири пешини энергетика ва қудои Эмомалӣ Раҳмон, Гул Шералӣ, Фаромӯз Саидов, писари ноиби сарвазири Тоҷикистон Давлаталӣ Саид, Рустам ва Расул писарони раҳбари собиқи Роҳи оҳани Тоҷикистон ва хеши раисҷумҳур Амонулло Ҳукумов расонаӣ шуда буд. Аммо парвандаи онҳо ҷиддӣ таҳқиқ нашуда, баъзе аз ҷавобгарӣ озоду баъзе ҷаримаи ночиз шуда буданд.
