Раҳбари Ҳизби либерал-демократи Русия Владимир Жириновский дар синни 76-солагӣ пас аз бемории тӯлонӣ даргузашт. Дар ин бора рӯзи 6-уми апрел раиси Думаи давлатии Русия Вячеслав Володин хабар дод.
Володин зимни як нишаст дар Думаи давлатии Русия аз марги Жириновский хабар дод. Фраксияи Ҳизби либерал-демократи Русия низ ин хабарро таъйид кардааст.
Жириновский дуюми феврали соли ҷорӣ бо нишонаҳои коронавирус дар бемористон бистарӣ шуда буд.
Рӯзи 25-уми март расонаҳо бо такя ба манобеи худ дар бораи марги Жириновский хабар дода буданд, вале баъдан ин хабарро Володин ва ҳизби Жириновский рад карданд ва иддао доштанд, ки вазъи саломатии ин сиёсатмадори рус муътадил аст.
Владимир Жириновский шаш маротиба номзад ба мақоми президентӣ буд ва дар байни мардум бо шеваи хашмгин суҳбат кардану изҳоротҳои шадидаш, аз ҷумла миллатгаронааш маъруф буд. Инчунин ӯ бо изҳороти баҳсбарангезаш дар бораи Тоҷикистону муҳоҷирони корӣ низ шинохта мешуд.
Ӯ аввалин ҳизби мухолифро дар Иттиҳоди Шӯравӣ сабти ном карда, то дами марг онро раҳбарӣ мекард. Дар охири солҳои 2000-ум ӯ ва ҳизбаш ба як шарики Кремл табдил ёфтанд ва дар аксар ҳолатҳо сиёсати Кремло дастгирӣ мекарданд.
