Вазорати Адлияи Тоҷикистон рӯзи 13 июл дар нишасти хабарӣ гуфт, ки баъд аз интишори вируси COVID-19 даҳҳо нафар аз зиндониён ба бемории илтиҳоби шуш гирифтор шуданд ва аз байни онҳо 11 тан фавтидааст.
Бино ба гуфтаи вазири адлияи Тоҷикистон Музаффар Ашӯриён, дар байни зиндониҳо вируси COVID-19 мунташир нашудааст ва танҳо 98 зиндонӣ гирифтори бемории пневмония ё илтиҳоби шуш шудаанд, ки ин беморӣ ба COVID-19 шабоҳати зиёд дорад.
Аммо наздикони маҳбусон дар ин маврид дигар чиз мегӯянд. Пештар хабарҳо нашр шуда буд, ки маҳбуси сиёсӣ Раҳматуллоҳи Раҷаб ба бемории илтиҳоби шуш гирифтор аст, аммо баъдтар писари ӯ Шуҳрати Раҳматуллоҳ гуфтаи мақомотро рад кард ва гуфт, ки ташхиси падарашро ба табибон нишон додааст ва табибон вуҷуди каронавирусро дар тани падараш тасдиқ карданд.
Ҳамзамон Абдулфайз Раҷабов, маҳбуси 47-сола, ки 9-уми май дар зиндони рақами 1-и Душанбе фавтид, мақомот гуфтанд аз илтиҳоби шуш даргузаштааст, аммо наздиконаш инро такзиб карданд ва гуфтанд, ки ӯ аз бемории COVID-19 даргузашт.
Дастарсӣ ба иттилои дақиқ оиди ҳолати зиндониён дар ин давраи интишори вируси COVID-19 бисёр мушкил аст. Танҳо хабарҳо аз тариқи наздикони маҳбусоне, ки ба ин бемории гирифтор шудаанд, метованад аз ҳолати баъзе зиндонон хабар диҳад, аммо ҳолати бақия норушан аст. Чун мақомот ба нашри ахбори дохили зиндон ба касе иҷозат намедиҳанд.
