Иззат Амон, ҳомии муҳоҷирони тоҷик, ки аз моҳи март ба ин сӯ дар боздоштгоҳ дар Душанбе қарор дорад, рӯзи 20 апрел зодрӯзашро пушти панҷара паси сар кард. Бар зидди Иззат Амон дар Душанбе бо иттиҳоми қаллобӣ парвандаи ҷиноятӣ кушодаанд.
Аммо мақомот намедонанд пас аз оварданаш бо ӯ чи кор кунанд. Дар ин бора сомонаи “Бомдод” аз қавли манобеаш хабар мадиҳад. “Овардани Иззат Амон як навъ идомаи мусобиқа байни гурӯҳҳои рақиб дар роҳбарии ВКД буд аст”.
Маонбеъи Бомдод: “Шоҳрух Саидзода як сол пеш Хӯҷа-командирро аз Дубай овард, ҳоло гуруҳи Шодӣ Ҳафиззода Иззат Амонро овард. Ҳадафи ин мусобиқаҳо, албатта, як чиз аст, ки оё кӣ баъди Рамазон Раҳимзода, ки инак 10 сол боз вазири дохила аст, ба курсии вазирӣ мешинад? Худи Шоҳрух ё ягон одами ӯ, ва ё Шодӣ Ҳафиззода, домоди бародари вазири кунунӣ ба ҷои хусураш вазир мешаваду бо ҳамин статус-квои феълӣ дар ин вазоратро ҳифз мекунад? Вале тавре ба назар мерасад, овардани Иззат он натиҷаеро, ки интизор доштанд, дода натавонист. Раҳбарияти сиёсии ҷумҳурӣ харҷи ин қадар нерӯву вақт ва шояд ҳатто пул барои овардани Иззатро ҳамчун “пул додану дарди сар харидан” ва як кори аз лиҳози сиёсӣ нобавақту нолозим маънидод кардааст. Дар ҳар сурат, ин кор ба “боло” зиёд хуш наомада. Эътирозҳои муҳоҷирон аз ин амал ба оташи норозигии роҳбарияти сиёсии Тоҷикистон аз ин амали худсаронаи ВКД боз ҳам равғани бештар рехт.”
Ба гуфтаи ҳамсуҳбати “Бомдод”, агар эътирозҳои муҳоҷирон дар Маскав идома мекард, мақомоти Душанбе маҷбур мешуданд Иззат Амонро раҳо кунанд ва ҳатто ба Маскав пас фиристанд.
Иззат Амон яке аз чеҳраҳои маъруфи тоҷик дар Русия аст, ки аз соли 2000 дар Маскав кору зиндагӣ мекунад ва солҳост аз ҳуқуқи муҳоҷирони тоҷик ҳимоят мекунад. Ӯро дар охири моҳи марти ҳамин сол шаҳрвандиашро дар Рӯсия бекор карданд ва худашро ба Тоҷкистон ихроҷ карданд. Дар Душанбе ӯро бо иттиҳоми қаллобӣ боздошт карданд.
Дар Маскав Ӯ ба мақсади кумак расондан ба муҳоҷирон марказеро бо номи “Маркази тоҷикон” кушод ва аз номи он ба муҳоҷирон ёрӣ мерасонд. Хусусан муҳоҷироне, ки мефавтиданд, талош мекард ҷасадҳои онҳоро тариқи марказаш ва бо кумаки хайрхоҳон ба ватан фиристад.
Иззат Амон пештар ҳам навишта буд, ки аз сабаби зиёд дидани ҳолатҳои маргу мири муҳоҷирон хаста шудааст ва мехоҳад марказашро бибандад.
Дар Тоҷикистон ҳоло як маъаракае бо иштироки фабрикаи ҷавоб бар алайҳи Иззат Амон роҳандозӣ шуда. Ин гурӯҳи зери ҳимояи мақомоти қудратӣ бар зидди Иззат Амон видео сабту нашр мекунанд ва шабакаҳои иҷтимоъиро бо “ҷабрдидаҳо”-и сохтаву бофта пур кардаанд.
Дар ҳамин ҳол муҳоҷирон ва фаъолон ҳукумати кишварро барои боздошти ин мудофеъи ҳуқуқи муҳоҷирон сахт танқид мекунанд ва дар Маскав чанд рӯзе пас аз боздошти Изат Амон як гирдиҳамоӣ бо иштироки муҳоҷирон роҳандозӣ шуд, ки дар он наздики ҳазор нафар иштирок ва талаби озодии Изат Амонро карданд.
