Зубайдуллоҳи Розиқ, зиндонии сиёсии 80-сола ва собиқ узви Раёсати олии Ҳизби наҳзати исломии Тоҷикистонро боз ба утоқи ҷаримавӣ (ШИЗО) интиқол додаанд.
Зубайдуллоҳзода Ҳисом, писари Зубайдуллоҳи Розиқ дар саҳфаи фейсбукиаш хабар дод, ки дирӯз 7-уми сентябр падари 80-солаашро боз ба ШИЗО, яъне утоқи ҷаримавӣ интиқол додаанд.
Ба навиштаи писари зиндонии сиёсӣ, сабаби интиқоли Зубайдуллоҳи Розиқ ба утоқи ҷаримавӣ “аз ҷойи хоби падараш пайдо кардани китоби Куръон ва адабиёти исломӣ будааст. Ва ин китобҳо барои режим мамнӯъ будаанд”.
Дар ҳамин ҳол як масъули зиндони шаҳри Ваҳдат ба Радиои Озодӣ гуфтааст, ки Зубайдуллоҳи Розиқ ба ҷурми “вайрон кардани низоми маҳбас” 15 рӯз ба утоқи ҷаримавӣ бурда шуд. Ин корманди зиндон иддао кардааст, ки “бо вуҷуди даъватҳои батакрор, Зубайдуллоҳи Розиқ бо истифода аз китобҳои мазҳабӣ ба таълими динии ҷавонон идома дод.”
“Ба домулло эҳтиром дорем. Гуфтем, марҳамат, намоз хонед, дуо кунед, лекин дар маҳбас таълими динӣ ғайриқонунӣ аст. Боз мешунавем, ки кори худро идома додааст. Дафъаи гузашта ҳам гуфта будем, риоя нашуд,” – шарҳ додааст намояндаи зиндони Ваҳдат ба Радиои Озодӣ.
Аммо Зубайдуллоҳзода Ҳисом, ин иттиҳомотро рад мекунад ва ба ин бовар аст, ки мақомоти маҳбас баъди ин ки падараш дар номае аз президенти Тоҷикистон баррасии дубораи парвандаашро хост, ӯро “чап” гирифтанд.
Ин бори аввал нест, ки ин зиндонии сиёсии солмандро кормандони зиндон ба утоқи ҷаримавӣ интиқол медиҳанд.
Пештар аз ин, чанд маротибаи дигар низ ин доишманди диниро, ки 80 cол дорад ба утоқи ҷаримавӣ бурдаанд. Аз ҷумла, бори охир ӯро бо ҷурми “хондани намози шаб” чунин муҷозот карда буданд. Аммо пас аз як ҳафта ва бо назардошти вазъи бади саломатияш ӯро ба утоқи муқаррарӣ баргардониданд.
Дар ин маврид Зубайдуллоҳзода Ҳисом моҳи августи соли ҷорӣ дар суҳбат бо Azda tv гуфта буд: “падарамро аз утоқи ҷаримавӣ раҳо кардаанд, вале саломатияш хуб нест. Хонавода имрӯз давоҳои лозимаро барояш бурданд”.
Наздикони Зубайдуллоҳи Розиқ борҳо дар бораи саломатии ӯ изҳори нигаронӣ карда буданд. Гуфта мешуд, чун утоқи ҷаримавӣ, ки хеле шароити вазнин дорад, таҳаммул кардани чунин шароит барои як пирамард хеле душвор аст.
Зубайдуллоҳи Розиқ ҳамроҳи дигар аъзоёни аршади ҲНИТ сентябри соли 2015 боздошт ва соли 2016 бо иттиҳомоти гуногун барои 25 сол аз озодӣ маҳрум карда шуд. Иттиҳометое, ки худи ӯ ва пайвандонаш ба куллӣ рад мекунанд.
