Додгоҳе дар вилояти Новосибирски Русия, зодаи Тоҷикистон Баҳодурҷон Аҳмадалиевро барои солҳои тӯлонӣ равонаи зиндон кард. Мурофиаи додгоҳии Баҳодурҷон 21-уми июли соли ҷорӣ пушти дарҳои баста баргузор шудаааст.
Бино ба иттилои расонаҳои русӣ, додрас Баҳодурҷон Аҳмадалиевро ба нигоҳдории ғайриқонунии таҷҳизоти тарканда ва қасди амали террористӣ айбдор дониста, ба 14 соли зиндон ва пардохти 50 ҳазор рубл ҷарима маҳкум намуд. Вале худи Баҳодурҷон ва вакили дифоаш ба ин ҳукми додгоҳ розӣ нестанд. Онҳо мехоҳанд аз болои ин ҳукми додгоҳ ба зинаҳои болоӣ шикоят баранд.
Ба иддаои мақомоти тафтишотӣ, Аҳмадалиев, ки дар Новосибирск ҳамчун ронанда кор мекард, гӯё аз сомонаи интернетӣ барои ду гумонбар дар ҳамла ба бинои “Крокус Сити Холл”, чипта харидааст. Гуфта мешавад, яке аз ин гумонбарон Далерҷон Мирзоев, ки дар Новосибирск зиндагӣ мекард ва таксист буд, мебошад.
Инчунин гӯё Баҳодурҷон як рӯз баъд аз ҳодисаи “Крокус”, яъне 23-уми марти соли гузашта, қасд доштааст, ки ҷойи ҷамъитиеро дар ноҳияи Железнодорожнийи Новосибирск тарконад. Аммо худи ҳамон рӯз аз ҷониби кормандони Хадамоти амнияти федералии Новосибирск ҳангоми тафтиши мошинаш, дастгир гардида буд.
Кормандони амният иддао доранд, ки дар вақти тафтиш, аз дохили мошини вай дастгоҳи тарканда ва китобҳои мазмуни ифротгароӣ доштаро пайдо кардаанд. Назари худи Аҳмадалиев дар ин бора то ҳол дастраси расонаҳо нашудааст ва чун Баҳодурҷон Аҳмадалиев ва вакили дифоаш ба ин ҳукми додгоҳ розӣ нестанд, эҳтимол дорад, ки ин иттиҳомоти кормандони амният ҳам асоси воқеӣ надошта бошанд.
