Сомзмони Милали Муттаҳид мегӯяд, ки бар асари заминларзаҳои шадиди Туркия ва Сурия 7 миллион кӯдак дар ин минтақа осеб дидааст.
Бино ба иттилои шабакаи “Алҷазира”, намояндаи Хазинаи кӯдакони Созмони Милали Муттаҳид (UNICEF) гуфтааст, ки бар асари заминларзаҳои 6-уми феврали соли 2023 ва пасларзаҳои он ҳудуди 7 миллион кӯдак осеб дидааст.
Ба қавли манбаъ, дар натиҷаи ин ҳодисаҳо дар Туркия ҳудуди 4,5 миллион кӯдак ҳамроҳ бо хонаводаҳояшон ва дар Сурия 2,5 миллион кӯдаки дигар ҳамроҳ бо хонаводаҳояшон аз даҳшати заминларзаҳо аз нигоҳи равонӣ осеб дидаанд ва ба дармон ниёз доранд.
ЮНИСЕФ дар бораи теъдоди кӯдакони қурбонишуда дар Сурия ва ё Туркия омори дақиқеро пешниҳод накардааст, вале коршиносон мегӯянд, ки теъдоди кӯдакони ҷонбохта ва ҷароҳатбардошта ба даҳҳо ҳазор нафар мерасад. Дар бораи кӯдакони беному нишон зери оворҳо ва вайронаҳо ба ҷо монда ҳоло чизе гуфта барвақт аст.
Гуфта мешавад, тибқи охирин оморҳои расмӣ аз Туркия ва Сурия теъдоди ҷонбохтагони ҳодисаҳои ахир аз марзи 37 ҳазор нафар убур кардааст, вале ҳамоно умедҳо барои наҷоти дигарон вуҷуд дорад.
Вақте ин хабар таҳия мешуд, аз Туркия хабар расид, ки мардеро пас 202 соат аз зери вайронаҳо зинда берун бароварданд. Кумитаи ҳолатҳои фавқулъодаи Тукрия ҳам эълон кардааст, ки дар ҳоли ҳозир 249 ҳазор нафар аз гурӯҳҳои наҷот ва ризокорон дар ҷойҳои ҳодиса машғули корҳои ҷустуҷӯи қурбониён ва наҷоти боқимондаҳо мебошанд.