Дар натиҷаи ҳамлаҳои ҳавоии Исроил болои Навори Ғазза дасти кам 25 нафар кушта, 60 нафари дигар захмӣ шудаанд, ки дар байни кушташудаҳо занону кӯдакон низ ҳастанд.
Гуфта мешавад, артиши Исроил субҳи рӯзи панвшанбе ҳамлаҳои ҳавоии худро ба биноҳои маскунӣ дар Навори Ғаззаи Фаластин идома дод, ки бар асари он чандин хона вайрону валангор гашта, кӯдакону занон кушта шуданд.
Артиши Исроил мегӯяд, дар ин ҳамлаҳояш, ки рӯзи сешанбе оғоз карда буд, раҳбарони шохаи Муқовимати Фаластинӣ – Ҷиҳоди исломиро ҳадаф қарор дода буд ва то имрӯз 4 нафар аз раҳбарони ин ҳаракатро куштааст.
Ҷиҳоди исломӣ низ дар посух баҳамлаҳои Исроил пойтахти ин кишвар, шаҳри Тел-Аавивро мушакборон кард. Тибқи иттилои расонаҳо, то ин дам аз Навори Ғазза ба сӯи шаҳрҳои Исроил, аз ҷумла Тел-Аавив ва Асқалон наздики 400 мушак партоб шудааст.
Дар наворҳое, ки дар шабакаҳои иҷтимоӣ роҳ ёфтаанд, дида мешавад, ки пас аз шунидани бонги хатар мардумро як ҳолати тарсу даҳшати беандоза фаро гирифта, ҳама аз соҳили дарё ва ё кӯчаҳо ба сӯи паноҳгоҳҳо мешитобанд.
Гуфта мешавад, бо вуҷуди фаъолияти гунбади оҳанини Исроил мушакҳои Ҷиҳоди исломӣ бар чанд нукта дар шаҳрҳои ин кишвар исобат кардааст. Аммо омори дақиқе аз шумори кушта ва захмӣ шудагони исроилӣ нашр нашудааст.
Ҷониби Исроил суҳбҳи рӯзи сешанбе амалиётеро зидди раҳбарони ҳаракати Ҷиҳоди исломӣ оғоз карда, хонаҳои онҳоро дар Навори Ғазза мавриди ҳамла қарор дод, ки гуфта мешавад, то имрӯз 4 нафар кушта шудаанд. Ҳаракати ҷиҳоди исломӣ низ мегӯяд, дар рад ба ҳамлаҳои Исроил шаҳрҳои ин кишварро мушакборон кард ва дар сурати идомаи ҳамлаҳои исроилӣ боз ҳам ба ин гуна мушакборон кардан идома хоҳад дод.
