Пас аз зиёд шудани сару садоҳо дар бораи бад шудани вазъи саломатии Александ Лукашенко, Президенти Белару мухолифони ин кишвар барои ҳар гуна сенарияҳои эҳтимолӣ омода мешаванд.
Свитлана Тихановская, раҳбари мухолифини Беларус аз мардуми ин кишвар ва ҷомеаи ҷаҳонӣ даъват кардааст, ки барои ҳар гуна сенарияҳои эҳтимолӣ омода шаванд, то тавонанд кишварро дубора ба самти низоми демократӣ баргардонанд.
Раҳбари мухолифини Беларус бо нашри чанд паём дар саҳфаи Твиттриаш таъкид кард, ки: “Мо на танҳо бар зидди зулму ситамҳои Лукашенко, балки бар зидди ишғоли Русия низ дар Беларус мубориза мебарем. Мисли украинҳои ҷасур, мо барои озодии худамон мубориза мебарем.”
Свитлана Тихановская дар идома афзуда, ки мардуми Балерус низ ҳақ доранд дар кишвари худашон орому осуда зиндагӣ кунанд, ва дар он ҷо ҳуқуқи инсон риоят шаваду дар ҷомеа озодии баён вуҷуд дошта бошад, то тавонанд озодона ақидаҳои худро баён кунанд.
Ӯ ҳамчунин аз ҷомеаи ҷаҳонӣ хостааст, ки барои расидани мардуми Белорус ба демократия фаъолона кумак кунанд. “Дар бораи саломатии диктотур Лукашенко овозаҳои зиёд вуҷуд дорад. Ин барои мо танҳо як маъно дорад: мо бояд ба ҳама гуна сенария хуб омода бошем. Барои роҳ додан ба Беларус дар роҳи демократия ва пешгирии дахолати Русия, мо ба кумаки ҷомеаи байналмилалӣ ниёз дорем ва мехоҳем фаъол ва зуд амал кунанд.”, мегӯяд Тихановская.
Гуфта мешавад, бо вуҷуди он, ки дирӯз расонаҳои расмии Беларус дар бораи сиҳату саломат будани президенти ин кишвар хабар дода буданд, вале чун дар рӯзҳои гузашта хабарҳои зиёде дар расонаҳои дохил ва хориҷи ин кишвар дар бораи бемор шудани Александ Лукашенко нашр шуда буд, раҳбари мухолифони ин кишвар низ аз ҷонибдоронаш хост, ки барои ҳар гуна сенарияҳои эҳтимолӣ дар ин кишвар омода шаванд ва ба ҷомеаи ҷаҳонӣ ин паёмро дода, ки мардуми ин кишвар ба кумак ва пуштибонии онҳо ниёз доранд.
