Рустам Ашӯров, шаҳрванди 43-солаи Тоҷикистон шаби 3-уми июли соли ҷорӣ дар бемористоне дар Молдова даргузашт. Дар ин бора Вазорати корҳои дохилаи Молдова субҳи имрӯз хабар дод.
Номбурда шоми 30-юми июн дар фурӯдгоҳи Кишинёв, замоне ки ба ӯ иҷозаи убур аз марзи ин кишварро надоданд, аз камари муовини сардори Нерӯҳои марзбонии Молдова дар фурӯдгоҳ Сергей Мунтияну туфангчашро гирфта, ӯ ва як маъмури бахши амниятиро кушт ва бар асари тирҳои ҷавобӣ Ашӯров захмӣ шуда, давоми се рӯз дар як бемористони ин кишвар дар ҳолати беҳушӣ қарор дошт.
Рустам Ашӯровро дар Тоҷикистон дар ҷинояти рабудани Шуҳрат Исматуллоев, муовини раиси “Ориёнбонк” гунаҳкор медонанд ва алайҳаш парванда боз шуда буд.
Вазорати дохилаи Молдова ба хабарнигорон гуфт, ки “Мо муайян кардем, ки Рустам Ашӯров собиқ корманди милисаи Тоҷикистон буда ва дар ин сохтор 7 сол кор кардааст.” Инчунин гуфта мешавад, Ашӯров бо иттиҳоми ғоратгарӣ аз вазифа ронда шуда ва зиндонӣ ҳам шудааст.
Расонаҳои маҳаллӣ рӯзи гузашта аз вахим будани вазъи саломатии Ашӯров гузориш дода буаданд. Вале аксари ҷомеаи тоҷик зинда мондани ӯро орзу мекард, то сирри рабудан ва эҳтимоли ҷинояти қатли занҷираии муовини раиси “Ориёнбонк” Шуҳрат Исматуллоев фош шавад. Вале Ашӯров ин сирро бо худ ба хок бурд.
Номи Рустам Ашӯров дар пайи рабуда шудани муовини аввали Ҳасан Асадуллозода, додараруси Эмомалӣ Раҳмон дар сархати расонаҳо қарор гирифт.
Мақомоти Тоҷикистон то кунун ба гумони даст доштан дар рабудани Шуҳрат Исматуллоев 4 нафар аз собиқ афсарони ниҳодҳои қудратиро боздошт кардаанд.
Радиои Озодӣ аз манобеи худ дар ниҳодҳои интизомӣ ва наздик ба тафтишот хабар дод, ки собиқ афсарон “ҳамроҳ бо ҷинояткорони собиқадор ин одамрабоиро анҷом додаанд”.
Ба иттилои манбаъ, яке аз боздоштшудагон афсари собиқи Вазорати корҳои дохилӣ ва Ожонси мубориза бо фасод будааст. “Ва як манбаи наздик ба хонаводаи Шуҳрат Исматуллоев мегӯяд, бо гумони ширкат дар ин ҷиноят як додситони собиқ низ боздошт шудааст.”
