Дар ноҳияи Бобоҷон Ғафурови вилояти Суғд ба муносибати 35-солагии Истиқлоли кишвар парчаме бо баландии 54 метр бунёд мегардад.
Тарве АМИТ “Ховар” дар истинод ба Хадамоти матбуоти Раиси вилояти Суғд иттилоъ дод, ин парчам дар майдони 1,2 гектар дар шаҳраки Ғафуров сохта мешавад.
Гуфта мешавад, раҳбарияти вилояти Суғд бо сафари корӣ ба ин ноҳия рафта, аз наздик ба кори он шинос шудаанду ба масъулин супоришҳои лозимаро доданд.
Аммо бархе бар ин назаранд, ин ноҳияи кишвар, ки бо Қирғизистон ҳаммарз аст ва ҳаргоҳе муноқишаҳо байни сокинон сар мезанад, дар чунин вазъият таъмини амният дар онҷо муҳим аст ё бунёди парчами пурхарҷе бо баландии 54 метр ва оростани гулгашту фаввораҳо, ки одатан баъди ифтитоҳ ободии чунин майдонҳо як сол ҳам тӯл намекашад ва ҳама ба харобазор мубаддал мешавад.
Мардуми кишвар борҳо шоҳиди чунин ҳолат буданд. Ҳатто ҳолатҳое вуҷуд дорад, ки роҳро то макони ташрифи Раҳмон асфалтпӯш мекунанд, 100 метр аз он поёнтар аз ободӣ хабаре нест.
Коршиносон ва таҳлилгарон иллати чунин худнамоиҳо ва масрафҳои пурхарҷи мақомотро дар реша давондани фасод дар баданаи ҳукумат медонанд. Ба қавли онҳо, ҳангоми бунёди иншооти муҳимме аз масъулини баландпоя шуруъ карда, то поёнтарин коргари сохтмон дуздӣ мекунад, ки дар натиҷа чунин корҳои бесифат ба вуҷуд меояд.