Таҳрики Толибони Тоҷикистон бо нашри як паём барномаи муфассали худро дар шакли як китоб нашр кардааст.
Бино ба иттилои бархе расонаҳои эронӣ, барномаи Таҳрики Толибони Тоҷикистон (ТТТ) зери унвони “Қазияи Тоҷикистон ва шеваи озодсозии он аз ишғол ва истибдод” дар шакли як китоб нашр шудааст.
Толибон аҳвол ва вазъияти кунунии Тоҷикистонро “фурсати тилоӣ” нимида, гуфтааст, ки “имрӯз фурсати тиллоӣ барои дубора инсиҷоми мардум ва талоши муҷаддад барои истирдоди ҳуқуқ ва сарзамин фаро расида, ҳоло вақти он омада, ки ба сад сол аз парокандагӣ нуқтаи поён бигзорем.”
Ин китоб иборат аз 4 фасл: 1. Ҳадаф ва рисолати мо; 2. Аз куҷо оғоз кунем; 3. Нишонаҳое дар роҳи мубориза; 4. Ислом роҳи ҳал, ва 92 боб иборат аст.
Толибон барои расидан ба ҳадафҳои худ фаъолиятшро чунин шарҳ дода, гуфтааст, ки дорои 5 сохтор: Ҷиноҳи низомӣ, ҷиноҳи фарҳангӣ, ҷиноҳи сиёсӣ, ҷиноҳи кадрсозӣ ва ҷиноҳи иқтисод амал мекунанд.
Толибони Тоҷикистон ин барномаи худро бо хатти форсӣ таҳия ва нашр кардааст. Ношири он пойгоҳе бо номи “Рисолат” гуфта мешавад. Аммо ба сурати савтӣ ва хатти криликӣ ҳам кам-кам дар бораи ин барномаи худ дар шабакаҳои иҷтимоӣ паёмҳои худро нашр мекунанд.
Гуфта мешавад, Таҳрики Толибони Тоҷикистон дар гузашта зери номи “Ҳаракати Ансоруллоҳи Тоҷикистон” фаъолият мекард. Ин созмон пас аз дубора ба қудрат расидани Толибон дар Афғонистон дар соли 2022 ба Таҳрики Толибони Тоҷикистон тағйири ном кард.
Тибқи як қарори Додгоҳи олӣ Ҳаракати Ансоруллоҳи Тоҷикистон ҳамчун созмони террористӣ ва экстримистӣ эътироф гардида, фаъолияти он дар қаламрави кишвар мамнуъ эълон шудааст. Тайи ду даҳсолаи ахир даҳҳо нафарро бо гумони иртибот доштан бо ин созмон боздошт ва ба муддатҳои тӯлонӣ равонаи зиндон кардаанд.
