Кормандони идораи барқи ноҳияи Фархор барқи хонаи модари Шарофиддин Гадоев, яке аз раҳбарони Паймони миллии Тоҷикистонро қатъ карданд.
Тавре Радиои Озодӣ хабар дод, кормандони идораи барқи ноҳияи Фархор рӯзи 11-уми октябр ба хонаи модари 72-солаи Шарофиддин Гадоев, Ойишамо Абдуллоева рафта, сими барқи ӯро буридаанд.
Мақомоти ноҳияи Фархор ва ё идораи барқи ин ноҳия сабаби қатъ кардани барқи хонаи модари Шарофиддинро расман шарҳ надодаанд.
Ойишамо Абдуллоева мегӯяд, бо вуҷуди он ки пули барқро ҳар моҳ пардохт мекунад ва аз он қарздор нест, вале кормандони барқ далели қатъи онро ба қарздор будану набудан марбут надониста, фақат ҳаминро гуфтанд, ки “писаратон дар Олмон баромад карда, президентро танқид кардааст, фармон аз боло аст.“
“Ман дар торикӣ чӣ хел роҳ мегардам, чӣ хел ғизо омода мекунам? Писари ман 38-сола аст, худаш медонад, ки чӣ мегӯяд, ба мани 72 сола чӣ кор доранд?”, гуфтааст Ойишамо Абдуллоева.
Шарофиддин Гадоев, раиси созмони “Ислоҳот ва рушди Тоҷикистон” созмони мухолифи ҳукумати Эмомалӣ Раҳмон мебошад.
Мухолифни ҳукумати кишвар алайҳи сафари Раҳмон ба Омлон дар торихи 28-29-уми сентябри соли ҷорӣ гирдиҳоамоии эътирозӣ ташкил карданд. Дар ин эътирозҳо рӯзи 29-уми сентябр ҷавонони “Гурӯҳи 24” ба мошини ҳомили Эмомалӣ тухм партоб карданд.
Пас аз ин ҳодиса мақомоти амниятии кишвар наздикону пайвандони мухолифон, ҳатто падару модарони пири онҳоро дар дохили кишвар боздошту бозпурсӣ карданд. Бархе онҳоро то ду се рӯз дар боздоштгоҳҳо нигоҳ доштанд.
