Бархе мақомоти исроилӣ Дабири кулли Созмони Милали Муттаҳидро ба пуштибонӣ аз терроризм муттаҳам карданд.
Бино ба иттилои расонаҳо, 24-уми октябри соли 2023 Антониу Гутерриш, Дабири кулли Созмони Милали Муттаҳид вақте дар нишасти Шӯрои амният суҳбат мекард, пас аз маҳкум кардани ҳамла ба Исроил дар 7-уми октябри соли ҷорӣ, афзуд, “ҳамлаи Ҳамос дар халоъ ба вуҷуд наомадааст.” Вай ҳамлаҳои Исроил ба Борикии Ғаззарро ҳам мавриди интиқод қарор дод.
Дабири кулли Созмони Милали Муттаҳид илова кард, ки “Мардуми Фаластин ба муддати 56 сол бо як ишғоли хафакунанда рӯбарӯ буданд. Онҳо диданд, ки дар заминҳояшон шаҳраксозӣ шудааст. Бо хушунат мувоҷиҳ шуданд. Иқтисодашон фурӯ пошидааст. Мадумашон овора шудаанд. Хонаҳояшон вайрон карда шудааст. Умедашон ба як роҳи ҳали сиёсӣ дар ҳоли аз байн рафтан аст.“
Ин изҳороти Дабири кулли Созмони Милали Муттаҳид дар як замони кӯтоҳ ба вокунишҳои тунде аз ҷониби мақомоти исроилӣ рӯбарӯ шуд. Вазири корҳои хориҷии Исроил, ки қарор буд бо Антониа Гутериш мулоқот кунад, ин дидорашро лағв кард.
Эли Коэн, вазири корҳои хориҷии Исроил дар саҳфаи Х-и худ навишт: “Ман бо Дабири кулли СММ мулоқот нахоҳам кард. Пас аз куштори 7-уми октябр дигар ҷое барои рӯйкарди мутаодил вуҷуд надорад. Ҳамос бояд аз рӯи замин маҳв карда шавад.“
Гилод Ердан, сафири Исроил дар СММ ҳам аз Антониу Гутерриш хост, ки фавран истеъфо диҳад ва таъкид кард, “гуфтугӯ бо касоне, ки нисбат ба ваҳшатноктарин ҷиноятҳо алайҳи шаҳрвандони Исроил ва яҳудиён ибрози ҳамдарӣ мекунанд, ҳеч фоидае надорад.“
Бени Гантс, узви кобинаи ҷанги Исроил ва раҳбари ҳизби “Урдугоҳи миллӣ” дар вокуниш ба ин изҳороти Дабири кулли СММ гуфт: “рӯзгоре, ки Дабири кулли СММ аз терроризм ҳимоят кунад, барои ҳамаи дунё рӯзгори сиёҳ ва торик хоҳад буд ва ҳеч тавҷиҳе барои куштори ғайринизомиён вуҷуд надорад.” Вай Антониу Гутерришро таҳдид карда гуфт: “Касе, ки дар тарафи дурусти торих қарор нагирад, муҷозот хоҳад шуд ва касе, ки терроризмро тавҷеҳ кунад, шоиста нест, ки аз номи ҷаҳониён сухан бигӯяд.“
АЗ сӯи дигар, Раҷаб Тайиб Ардуғон, Президенти Туркия имрӯз зимни суханроние ба қазия Фаластин вокуниш карда, СММ-ро як созмони бекифоят хонд. Ӯ гуфт: “Ҳамос як гурӯҳи террористӣ нест, (балки) гурӯҳи муташакил аз муҷоҳидоне ҳаст, ки барои расидан ба раҳоии миллӣ меҷанганд. Бояд музокирот барои озодии гаравгонон фавран оғоз карда шаванд.”
